Turizm

Ana səhifə

Turizm

Ümumdünya Turizm Təşkilatının baş katibi Taleb Rifaiyə Azərbaycan Turizm İnstitutunun ilk fəxri doktoru adı verilib

16 noyabr 2011 10:18 (UTC +04:00)

APA-nın məlumatına görə, görüşdə mədəniyyət və turizm nazirinin müavini Nazim Səmədov, ATİ-nin rektoru, tarix elmləri doktoru Cəfər Cəfərov və institutun Elmi Şurasının üzvləri iştirak ediblər.

Rektor Cəfər Cəfərov Taleb Rifainin instituta gəlişindən məmnun olduğunu bildirib. O, ilk olaraq institutun yaranmasından, ixtisaslı kadr hazırlığı sahəsindəki fəaliyyətindən danışıb. Rektorun sözlərinə görə, 2006-cı ildə yaradılan ATİ-də birinci il 3 ixtisas üzrə 200 tələbə təhsil alıb. Hazırda isə bakalavr pilləsində 11 ixtisas üzrə 1300 tələbə , magistr pilləsində 7 ixtisas üzrə 41 tələbə oxuyur. Eyni zamanda bu il 8 ixtisas üzrə 16 nəfər doktoranturada təhsil alır. İnstitutda 186 nəfərdən ibarət müəllim, professor heyəti fəaliyyət göstərir. Rektor qeyd edib ki, ATİ Avstriyanın Krems Universiteti ilə əməkdaşlıq edərək Azərbaycanda ikili diplom verən ilk ali təhsil ocağıdır. Cəfər Cəfərov onu da vurğulayıb ki, Elmi Şuranın yekdil qərarı ilə ÜTT-nin baş katibi Taleb Rifai Azərbaycan Turizm İnstitutunun ilk fəxri doktoru seçilib. Bu münasibətlə Taleb Rifaiyə diplom və döş nişanı təqdim olunub.

T. Rifai ATİ-də səmimi qarşılanmadan və bu təhsil ocağının ilk fəxri doktoru seçilməsindən razı olduğunu deyib. Baş katibin sözlərinə görə, hazırda turizm sahəsi özünün intibah dövrünü yaşayır: “50 ildən sonra bu sahədə çalışan şəxslər deyəcəklər ki, məhz bu illər turizmin intibah dövrü idi”. Baş katib Azərbaycanın ÜTT-yə üzv seçilməsindən şərəf duyduğunu da dilə gətirib.

Görüşün sonunda Taleb Rifaiyə Qarabağ xalçası hədiyyə olunub.