Turizm

Ana səhifə

Turizm

Ümumdünya Turizm Təşkilatının baş katibi: “Azərbaycanda turizm sahəsinin inkişafı bir çox ölkələrə nümunə ola bilər”

16 noyabr 2011 10:48 (UTC +04:00)

Bakı. Ülkər Qasımova - APA-Economics. Dünyada gedən iqtisadi böhran turizm sahəsinə də təsirini göstərir. “APA-Economics”in məlumatına görə, bunu jurnalistlərə açıqlamasında Azərbaycanda səfərdə olan Ümumdünya Turizm Təşkilatının (ÜTT) baş katibi Taleb Rifai deyib.

ÜTT baş katibi deyib ki, turizm iqtisadiyyatın bir sahəsi olaraq iqtisadi böhrandan müəyyən qədər əziyyət çəkir: “Lakin bu göstəricilər iqtisadiyyatın digər sahələrində olan böhranla çox əlaqələndirilmir. 2010 və 2011-ci illərdə digər iqtisadi sahələrdə problemlərin mövcudluğuna baxmayaraq, turizm sahəsində yüksəliş və inkişaf gözə çarpıb”.

T.Rifainin sözlərinə görə, 2010-cu ildə turizm sahəsindəki inkişaf 7% olubsa, 2011-ci ildə bu göstərici 4,5%-ə çatıb. Hətta Yunanıstan, İspaniya, Portuqaliya kimi iqtisadi problemi olan ölkələrdə belə turizm sahəsində yüksəliş 7-10% həcmində olub: “2012-ci ildə isə yüksəlişin 3-4% həcmində olacağını gözləyirik. Çünki bizim sahə elə bir sahədir ki, insanların daim ehtiyacındadır. Ümumiyyətlə, turizm iqtisadiyyatın digər sahələrindən asılıdır və oradakı tendensiyalar turizmə də öz təsirini göstərir. Amma turizmin digər iqtisadi sahələrə bağlılığı daha aşağı səviyyədədir”.

ÜTT baş katibi ölkəmizdə turizm sahəsinin inkişaf göstəricilərindən də söz açıb. Qeyd edib ki, son 5-6 il ərzində Azərbaycanda turizm sahəsində böyük bir yüksəliş var: “Azərbaycan bu sahədə bir çox ölkələrə nümunə ola bilər. 2011-ci ildə Azərbaycanın turizm sahəsində inkişafı hardasa 15%-ə çatıb. Azərbaycan prezidenti tərəfindən 2011-ci ilin “Turizm ili” elan edilməsi ölkədə bu sahəyə diqqət və dəstəkdən xəbər verir. Azərbaycanın digər məkanlarında bir neçə böyük həcmli layihələrin həyata keçirilməsi də bunun göstəricisidir”.

ÜTT ilə Azərbaycan Turizm İnstitutunun gələcək əməkdaşlığından danışan Taleb Rifai qeyd edib ki, birgə tədqiqatların aparılması, ÜTT mütəxəssislərinin burada layihələr həyata keçirilməsi planlaşdırılır: “Bundan başqa, institutun nümayəndələri bizim ofislərdə və müxtəlif qurumlarımızda iş üslubuna baxıb öz proqramlarında dünya standartlarına uyğun dəyişiklik edə bilərlər”.