Turizm

Ana səhifə

Turizm

Azərbaycan paytaxtında hotel işçiləri üçün “Eurovision-2012”yə hazırlıq kursları keçirilir - FOTOSESSİYA

Azərbaycan paytaxtında hotel işçiləri üçün “Eurovision-2012”yə hazırlıq kursları keçirilir - <font color=red>FOTOSESSİYA</font>

25 noyabr 2011 12:42 (UTC +04:00)

Bakı. Ülkər Qasımova - APA. Azərbaycanın gələn ilin mayında “Eurovision-2012” mahnı müsabiqəsinə ev sahibliyi etməsi ilə bağlı paytaxt hotellərinin işçiləri üçün xüsusi təlim-tədris kursları həyata keçirilir. Qeyd olunan təlim-tədris kursları Mədəniyyət və Turizm Nazirliyi, TİKA və Türkiyə Mədəniyyət və Turizm Nazirliyi ilə danışıqları əsasında baş tutur.

APA-nın əməkdaşı paytaxtda fəaliyyət göstərən “Qafqaz Park” və Azərbaycan Turizm İnstitutunda noyabrın 21-dən etibarən 4 bölüm üzrə keçirilən kurslarda iştirak edib və maraqlı məlumatlar əldə edib. Məlum olub ki, əsasən mehmanxana idarəçiləri, qeyd-qəbul, masa xidməti, xadiməçilik üzrə dərsləri Türkiyədən dəvət olunmuş müəllimlər tədris edir. Bu istiqamətdə treninqlər paytaxtda fəaliyyət göstərən mehmanxana və ona bərabər tutulan yerləşdirmə obyektlərində xidmət səviyyəsinin yüksəldilməsinə yönəlib. “Eurovision-2012”yə hazırlıq məqsədi daşıyan kurslarda turizm sektorunda çalışan mütəxəssislər üçün yemək-içmək servisi və mehmanxana xidməti öyrədilir.

Türkiyədən xüsusi olaraq bunun üçün paytaxta gələn Türkiyə Mədəniyyət və Turizm Nazirliyinin müvafiq bölümlər üzrə mütəxəssisləri Elif Özkan Yərci, Özləm Öyər Mərt, Abdi Dölek və Cezzim Özdemir təcrübələrini bölüşürlər. Elif Özkan Yərci hesab edir ki, paytaxt Bakı böyük masştablı yarışmaya hər sektorda hazır olmalıdır: “Qonaqlara düzgün xidmət, səviyyəli qarşılama və onları məmnun etmək artıq ölkə haqqında çox şey deməkdir. Bizim də məqsədimiz qardaş ölkə olan Azərbaycana bu yarışma öncəsi yardım etməkdir. 5 gün az müddət olsa da, biz təcrübələrimizi, biliklərimizi onlarla bölüşməyə çalışırıq”.

14 ildir bu işlə məşğul olan Özləm Öyər Mərt də paytaxtdakı hotellərdən bu kurslara cəlb olunanların səviyyəsindən razılığını ifadə edib. Azərbaycan Turizm İnstitutunda dərs deyən Abdi Dölek və Cezzim Özdemir Bakının hotellərindəki işçilərin səviyyəsinin yüksəlməsi yönündə əllərindən gələni etdiklərini vurğulayıblar.

Qeyd olunan kurslarda paytaxtda fəaliyyət göstərən hotellərdən seçilmiş işçi heyəti iştirak etmək hüququ qazanıb. Hər hoteldən iki işçi bu kurslara cəlb olunub. Ümumilikdə bu təlim-tədris kurslarında 40 hoteldən 100 işçi iştirak edib və bu gün həmin kurs iştirakçılarına xüsusi sertifikatlar təqdim olunacaq.

Kurslarda iştirak edən və paytaxtda fəaliyyət göstərən hoteldə restoran meneceri vəzifəsində çalışan Elçin Həbilov turizm hotelçiliyi ilə bağlı 6 ay Qarsda xüsusi kurs aldığını deyib: “Treninqlərə qatılmağımız nəinki “Eurovision”da Avropa ölkələri qarşısında üzüağ çıxmamız deyil, eyni zamanda bu bizim gələcəyimiz üçün də çox yaxşı haldır. Qardaş ölkə Türkiyə dünyada turizm üzrə ən güclü beş ölkədən biridir. Sözsüz ki, onlardan bu sirləri yiyələnmək və öyrənmək bizi çox sevindirir. Hər hoteldən iki nəfər iştirak edir və bizlər burada topladığımız təcrübəni öz hotelimizdə həmkarlarımızla da bölüşəcəyik. Sözün düzü, bu kurslar mən 6 ay müddətində Qarsda öyrəndiklərimdən fərqli biliklərə yiyələnməyimə zəmin yaratdı”.

Kurslarda iştirak edən digər hotel işçisi Sadiq Abdullayev treninqlərin dünya standartlarına uyğun şəkildə həyata keçirdiyini bildirib. Paytaxt hotellərində fəaliyyət göstərən kurs iştirakçıları artıq özlərini “Eurovision-2012”yə hazır hiss etdiklərini deyiblər.

Qeyd edək ki, kursların növbəti il üçün “Eurovision” yarışmasına qədər yenə də təşkili nəzərdə tutulur. Bu gün beş günlük kurslarda iştirak edən dinləyicilərə sertifikatlar təqdim olunacaq.