Turizm

Ana səhifə

Turizm

Azərbaycanlı turistlərə Krımda günü 30 avroya dincəlmək təklif olunur

20 dekabr 2011 15:17 (UTC +04:00)

Bakı. Əli Əhmədov - APA-Economics. Krım kurortları Azərbaycandan olan turistləri cəlb etmək üçün həm turistlərə, həm də Azərbaycan şirkətlərinə böyük güzəştlər təqdim etməyə hazırlaşır.

«APA-Economics»in məlumatına görə, bu barədə Bakıda səfərdə olan Ukraynanın Krım Muxtar Respublikasının nümayəndə heyətinin rəhbəri, Krımın kurortlar və turizm naziri Aleksandr Liyev bu gün keçirilən mətbuat konfransında məlumat verib.

Qeyd edək ki, Krım Muxtar Respublikası və Azərbaycan hökumətləri arasında əldə olunmuş razılığa əsasən həyata keçirilən səfərdə məqsəd Krımla Azərbaycan arasında turizm, xüsusilə də müalicə turizmi sahəsində əlaqələrin inkişaf etdirilməsidir.

A.Liyev bildirib ki, Qara dəniz sahilində ən böyük turizm mərkəzi olan Krımda 3500 hotel, pansionat və müalicəxana fəaliyyət göstərir. 240 sanatoriya il boyu fəaliyyət göstərə bilir: «Təkcə bu ilki mövsümə hazırlıq çərçivəsində bu kurortlara 600 mln. qriven vəsait yatırılıb. Ümumilikdə isə 2020-ci ildə Krımın sanatoriya-kurort təsərrüfatının müasirləşdirilməsi üçün 2 mlrd. qriven yatırılacaq».

Nazir xüsusi qeyd edib ki, Krım sanatoriyaları ənənəvi yay istirahət mərkəzləri yox, müalicəxanalar kimi fəaliyyət göstərirlər: «Burda müxtəlif xəstəliklərin, o cümlədən uşaqlar arasında geniş yayılan xəstəliklərin müxtəlif üsullarla, dərmansız müalicəsi həyata keçirilir».

Turizm kompleksinin inkişafı üçün görülən addımlardan biri də ayrı-ayrı regionlarla əməkdaşlıqdır. Bunun üçün seçilmiş 12 istiqamətdən biri də Azərbaycandır. A.Liyevin sözlərinə görə, Krım Qafqaz ölkələri arasında əməkdaşlığa ilk növbədə Azərbaycandan başlamaq niyyətindədir.

Qeyd edək ki, hazırda Azərbaycanda Ukrayna arasında turist dövriyyəsi ildə 90 min nəfərdir. Bunlardan 60 mini Azərbaycandan Ukraynaya, 30 mini isə əks istiqamətdə gedir. Əməkdaşlıq nəticəsində 2015-ci ilədək turistlərin sayını 200 min nəfərə çatdırmaq nəzərdə tutulur. Bunun üçün Krım tərəfi həm istirahətə gələn Azərbaycan vətəndaşlarına, həm də səfəri təşkil edən aviasiya şirkətləri və turoperatorlara böyük güzəştlər təqdim etməyə hazırdır.

Nazirin sözlərinə görə, Azərbaycan vətəndaşları Krımın 3 ulduz səviyyəli sanatoriya və müalicəxanalarında günü 30 avrodan başlayan qiymətlərlə müalicə oluna bilərlər. Bura yaşayış, qidalanma, diaqnostika, 5 müalicəvi prosedur, o cümlədən əllə masaj aiddir. Krım təmsilçisinin sözlərinə görə, bu qiymətlər Azərbaycanın yerli turizm şirkətlərini bu işə həvəsləndirməlidir: «Biz indi yerli turizm şirkətləri ilə əməkdaşlıq barədə danışıqlar aparır və müqavilələr bağlayırıq».

Azərbaycanın səhiyyə naziri ilə görüşən Krım nümayəndə heyəti nazirə Krım kurortlarının müalicə imkanlarını qiymətləndirmək üçün ora nümayəndə heyəti göndərməyi də təklif edib: «Məsələn, Moskva hökuməti bunu araşdırdı və müalicənin keyfiyyətindən razı qalaraq bunu əhaliyə də tövsiyə etdi».

Paralel olaraq Ukrayna tərəfi Azərbaycanın turizm imkanlarını təbliğ etmək üçün Ukrayna dövlət televiziyasında Azərbaycan haqqında pulsuz reklam məlumatları yerləşdirməyə hazırdır.