Turizm

Ana səhifə

Turizm

Bu il Azərbaycandan Türkiyəyə gedən turistlərin sayı 500 mini keçib

26 dekabr 2011 10:00 (UTC +04:00)

Bakı. Ülkər Qasımova - APA-Economics. Türkiyəyə gələn turist sayı 30 milyonu aşıb. Bu barədə “APA-Economics”ə Türkiyənin Azərbaycandakı səfirliyinin Mədəniyyət və turizm müşavirliyindən məlumat verilib.

11 ayda Azərbaycandan Türkiyəyə gedən turist sayı da yarım milyonu keçib. Bildirilib ki, 2011-ci ilin yanvar-noyabr aylarında Azərbaycandan Türkiyəyə gedən turist sayı 539 678 nəfər olub. 2010-cu ilin eyni dövrü ilə müqayisədə 21,17% artım olduğu müşahidə edilib. Keçən ilin 11 ayında Türkiyəyə gedən azərbaycanlı turistlərin sayı 445 383 nəfər olub (Fərq +94 295 nəfər).

Cari ilin noyabr ayında Türkiyəyə gələn əcnəbi turistlərin sayı 1 596 295 nəfər olub ki, bu da keçən ilin eyni ayı ilə müqayisədə 7,06% artım deməkdir. Bu ilin 11 ayında (yanvar-noyabr) Türkiyəyə gələn turist sayında keçən ilin eyni dönəminə görə 10,18% artım qeydə alınıb.

Hesabat dövründə Türkiyəyə gələn 30 261 343 nəfər turistin 37,34%-i (10 347 283 nəfər) Antalya, 24,81%-i (7 507 799) İstanbul, 10,15%-i (3 071 305) Muğla, 8,35%-i (2 528 197) Ədirnə, 4,44%-i (1 342 577) İzmir giriş qapılarından ölkəyə daxil olub. 2003-cü ildə 13 mln. turist qəbul edən Türkiyə 2023-cü ildə 50 mln. turist qəbul etməyi və turizm sektorundan ildə 50 mlrd. dollar gəlir əldə etməyi planlaşdırır. Hədəfə çatmaq üçün Türkiyə, sadəcə, isti dəniz sahillərini əhatə edən yay turizmi ilə kifayətlənməyib, Hitit, Rum və Türk mədəniyyəti nümunələrinin iç-içə yer aldığı İç Anadolu və bənzərsiz qış turizmi təsislərinə sahib olan Şimal-şərqi Anadolunun turizm imkanlarından istifadə etmək üçün böyük layihələr həyata keçirməkdədir.