Turizm

Ana səhifə

Turizm

Azərbaycan əhalisi Yeni ili Birləşmiş Ərəb Əmirlikləri, Türkiyə və Gürcüstanda keçirməyə üstünlük verib

30 dekabr 2011 12:18 (UTC +04:00)

Bakı. Nicat Mustafayev - APA-Economics. Bu il Azərbaycan əhalisi Yeni il bayramını əsasən Birləşmiş Ərəb Əmirlikləri, Türkiyə və Gürcüstanda keçirməyə üstünlük verib. Bu barədə «APA-Economics»ə ölkənin bir neçə aparıcı turizm şirkətlərindən bildirilib.

Turizm şirkətlərinin məlumatlarına əsasən, ümumiyyətlə, bu il ölkə əhalisinin Yeni il bayramını xaricdə qeyd eləməyə marağı artıb: «Azərbaycan turistlərinin Yeni il ərəfəsində üstünlük verdiyi əsas istiqamətlər Dubay, Uludağ, Tiflis kimi şəhərlər olub. Ümumiyyətlə, Azərbaycan turistlərini bir neçə qrupa bölmək olar ki, onlardan bir qismi Yeni il ərəfəsində isti ölkələrə, bir qismi dağ-xizək kurortlarına, bir qismi isə Avropa ölkələrinin paytaxtlarına üz tutub».

Satılan turpaketlərin sayına görə məlum olub ki, Azərbaycan əhalisinin əksəriyyəti Yeni il bayramını Birləşmiş Ərəb Əmirlikləri, Türkiyə və Gürcüstanda keçirməyə üstünlük verib: «Eyni zamanda Praqa, Paris, Vyana kimi şəhərlərə də kifayət qədər turpaket satılıb. Məsələn, Praqaya bu il maraq kəskin artıb. Belə ki, Çexiyanın paytaxtında keçirilən Yeni il şənlikləri çox yüksək səviyyədə təşkil olunur».

Turizm şirkətlərindən, həmçinin bildirilib ki, bu il kifayət qədər Azərbaycan turisti xizək sürmək üçün İsveçrə, Gürcüstan (Bakuriani, Qudauri), Türkiyə (Uludağ) kimi istiqamətləri seçib: «Turistlərin bir qismi də Yeni il bayramını İstanbul, Kiyev və Moskva şəhərlərində qarşılayacaq. Yeni ili ekzotik yerlərdə də qarşılayacaq Azərbaycan turistləri tapılıb. Belə ki, turistlərin bir qismi Maldiv adalarına üstünlük verib».

«Turistlər əsasən, 5-7 günlük turpaketlər sifariş edib ki, turpaketlərin 1 nəfər üçün qiymətləri istiqamətdən və xidmətin keyfiyyətindən asılı olaraq orta hesabla 500-800 manat civarındadır», - deyə turizm şirkətlərinin birindən bildirilib.

Qış istirahətinə yollanan turistlərin sayına gəldikdə isə, turizm şirkətlərindən qeyd olunub ki, bu il 2010-cu ilə nisbətən qismən də olsa, artım müşahidə olunur.