Turizm

Ana səhifə

Turizm

Azərbaycanda “Turizm haqqında” yeni qanun layihəsi hazırlanıb

06 fevral 2012 14:47 (UTC +04:00)

Bakı. Ülkər Rəşidqızı - APA-Economics. Azərbaycanda “Turizm haqqında” yeni qanun layihəsi hazırlanaraq ictimaiyyətin müzakirəsinə təqdim olunub.

Mədəniyyət və Turizm Nazirliyinin turizm şöbəsindən “APA-Economics”ə verilən məlumatda bildirilib ki, 20 gün müddətində müvafiq rəy və təkliflər qəbul olunacaq.

Azərbaycanda turizm haqqında hazırda qüvvədə olan qanun 1999-cu ildə qəbul edilib. Həmin qanun 90-cı illərdə Azərbaycanın dünya dövlətləri ilə münasibəti və onun geostrateji mövqeyi nəzərə alınaraq qəbul edilib. Bu qanun daha konservativ görüşlərə dayanaraq, hətta o dövrdəki Azərbaycanda və dünyada turizm sahəsində gedən dinamik prosesləri əks etdirmir.

İndiyə qədər mövcud turizm qanununa bir neçə əlavələrin olmasına baxmayaraq, bu məqamlar Azərbaycanda turizmə dair yeni qanunun qəbul edilməsini çıxılmaz edib. Beləliklə, yeni qanun layihəsinin hazırlanmasının məqsədi yuxarıda qeyd olunan qüsurların aradan qaldırılması, Azərbaycanda turizm sahəsində yaranan ictimai münasibətlərin kompleks şəkildə tənzimlənməsi, turizm xidmətlərinin müasir standartlara uyğunlaşdırılması və Azərbaycan turizm bazarının dünya turizm bazarına inteqrasiyasının təmin edilməsidir.

Yeni qanun layihəsinin tənzimləmə mövzusunu turizm sahəsində yaranan ictimai münasibətlər təşkil edir. Bu ictimai münasibətlər Qanun layihəsində fəsillərlə bölünərək təsnifatlaşdırılıb.

“Turizm haqqında” yeni qanunun qəbul edilməsi Azərbaycan qanunvericiliyi ilə turizm Avropa standartları arasında olan fərqləri aradan qaldırılmasına yardım edəcək, Ümumdünya Turizm Təşkilatının qərar və tövsiyələrinin Azərbaycanda tətbiqinə və ölkə qanunvericiliyinə implementasiya edilməsini sürətləndirəcək, turistlərin təhlükəsizliyi daha yüksək səviyyədə, yeni üsul və metodlarla təmin ediləcək, Azərbaycanın informasiya təhlükəsizliyi üçün onun turizm ehtiyatları, mədəniyyəti və tarixi barədə yanlış məlumatların verilməsindən yaranan təhdid aradan qaldırılacaq, turizm sahəsində xidmətlərin keyfiyyəti artacaq, turizm infrastrukturu təkmilləşəcək, yeniləşəcək, genişlənəcək, turizm infrastrukturuna investisiya qoymaq imkanları artacaq və turizm sənayesi inkişaf edəcək.