Turizm

Ana səhifə

Turizm

Azərbaycan Krımda və Almaniyada keçiriləcək beynəlxalq tədbirlərdə iştirak edəcək

29 fevral 2012 15:52 (UTC +04:00)

Bakı. Ülkər Rəşidqızı - APA-Economics. Azərbaycan Krım Muxtar Respublikasının (KMR) Yalta (Ukrayna) şəhərində KMR-in Kurortlar və Turizm Nazirliyi tərəfindən keçiriləcək I Beynəlxalq Qara Dəniz Forumunda və 7-11 mart tarixlərində Almaniyanın Berlin şəhərində keçiriləcək “lTB 2012” beynəlxalq turizm sərgisində iştirak edəcək.

Mədəniyyət və Turizm Nazirliyinin turizm şöbəsindən “APA-Economics”ə verilən məlumata görə, tədbirlərdə Azərbaycanın mədəniyyət və turizm nazirinin müavini Nazim Səmədovun rəhbərlik etdiyi nümayəndə heyətinin iştirakı nəzərdə tutulur.

Krım Muxtar Respublikasının Yalta şəhərində iştirak edəcək Azərbaycan nümayəndə heyətinin tərkibinə Mədəniyyət və Turizm Nazirliyinin turizm şöbəsinin xarici turizm sektorunun məsləhətçisi Səid Rüstəmov da daxildir. Forumda Azərbaycanın mədəniyyət və turizm nazirinin müavini Nazim Səmədov “Azərbaycanın turizm potensialı: Qara dəniz ölkələri arasında alternativ turizmin inkişafı” adlı məruzə ilə çıxış edəcək. Səfər çərçivəsində Azərbaycan Mədəniyyət və Turizm Nazirliyi və KMR Kurortlar və Turizm Nazirliyi arasında əməkdaşlığın gücləndirilməsi, Azərbaycandan Krıma və əks istiqamətdə turist axınının çoxaldılması, ikitərəfli yeni layihələr, Azərbaycanın yeni turizm imkanlarının aşkarlanması, Qara dəniz ölkələri arasında alternativ turizmin inkişafı və digər məsələlər müzakirə ediləcək.

Bildirilir ki, 2004-cü ildən başlayaraq Mədəniyyət və Turizm Nazirliyi və yerli turizm şirkətləri hər il “lTB” beynəlxalq turizm sərgisində təmsil olunur. Cari ildə adıçəkilən sərgidə respublikamızın turizm imkanlarını əks etdirən 104 m² sahədə lövhə qurulacaq. Səfər çərçivəsində Azərbaycan və Almaniya arasında mövcud əməkdaşlığın müzakirə olunması və gələcək əlaqələrin gücləndirilməsi məqsədilə nazir müavini Nazim Səmədovun bir sıra ikitərəfli görüşləri keçiriləcək. “lTB 2012” sərgisinin rəhbərliyi ilə keçiriləcək görüş zamanı ölkəmizin “lTB” beynəlxalq turizm sərgisində iştirakı və gələcək əməkdaşlıq imkanları müzakirə olunacaq.