Turizm

Ana səhifə

Turizm

Azərbaycan Turizm İnstitutunun nümayəndələri Ərzurumda keçirilən beynəlxalq tədbirlərdə iştirak edib - FOTO

Azərbaycan Turizm İnstitutunun nümayəndələri Ərzurumda keçirilən beynəlxalq tədbirlərdə iştirak edib - <font color=red>FOTO</font>

09 mart 2012 10:31 (UTC +04:00)

Bakı. Ülkər Rəşidqızı - APA-Economics. Türkiyənin Ərzurum şəhərində Avrasiya İpək Yolu Universitetləri Konsorsiumunun (ESRUC) İcraedici Şurasının iclası keçirilib.

“APA-Economics”in xəbərinə görə, 2010-cu ilin may ayında əsası qoyulmuş Avrasiya İpək Yolu Universitetləri Konsorsiumunun məqsədi İpək Yolu üzərində yerləşən dövlətlərdə təhsilin, mədəniyyətlərarası dialoqun inkişaf etdirilməsi və möhkəmləndirilməsinə, akademik inkişafın dəstəklənməsi ilə zəngin mədəni irsin bərpasına və qorunmasına, eləcə də bu sahədə prioritet istiqamətlərin müəyyənləşdirilməsinə xidmət edir.

Konsorsiumun İcraedici Şurasına 9 nəfər - Atatürk Universiteti, Pakistan Beynəlxalq İslam Universiteti, İtalyanın Padua Universiteti, Monqolustan Milli Universiteti, Qırğızıstan Beynəlxalq Universiteti, Putra Malayziya Universiteti, Tiflis Dövlət Tibb Univeristetinin rəhbərləri daxildirlər. Azərbaycanı isə bu mötəbər qurumda Azərbaycan Turizm İnstitutunun (ATİ) rektoru Cəfər Cəfərov təmsil edir.

İclası giriş sözü ilə Konsorsiumun prezidenti, Atatürk Universitetinin rektoru doktor Hikmet Koçak açıb. İclasda üzv ali təhsil müəssisələri arasında tələbə və müəllim mübadiləsi, ilkin mərhələdə konkret bir istiqamət üzrə tədrisin uyğunlaşdırılması, gələcəkdə konsorsiuma qoşulmaq istəyən tərəflər arasında Anlaşma Memorandumunun vahid forması, ESRUC üzvlərinin vahid məlumat bazasının yaradılması, Avropa Birliyinin “Erasmus Mundus” proqramına müvafiq əməkdaşlıq perspektivləri kimi məsələlər müzakirə edilib.

ATİ-nin rektoru C.Cəfərov iclasda səslənən fikirlərə münasibət bildirdikdən sonra müəllimlərin işə götürülməsi, ali məktəblərin kadr potensialı haqqında vahid məlumat bazasının yaradılması, birgə elanların işlənib hazırlanması, veb səhifənin fəaliyyətinin genişləndirilməsi, Qərb ölkələrinin ali təhsil məktəblərinin təcrübəsinin öyrənilməsi məsələləri ilə bağlı təkliflərlə çıxış edib. Azərbaycan tərəfinin təklifi ilə Ümumdünya Turizm Təşkilatının “İpək Yolu” proqramı çərçivəsində 2012/2013-cü illər üçün müəyyən edilmiş strategiya və istiqamətlərin ESRUC-un İpək Yolu proqramı ilə əlaqələndirilməsi, xüsusilə gələcək kadrlar qismində ali təhsil müəssisələri tələbələrinin bu prosesə cəlb edilməsi, turizm üçün faydalı istiqamətlər üzrə tədqiqatların aparılması qərara alınıb.

İcraedici Şuranın III iclası ilə paralel olaraq I Qış Anadolu Sammiti - “Turizm, idman, biomüxtəliflik və qlobal dəyişikliklər mövzusunda birgə layihələr” adlı beynəlxalq konfrans keçirilib. Tədbirdə Pakistan, Malayziya, Banqladeş, Tacikistan, ABŞ, Monqolustan, Fransa, Gürcüstan, Qazaxıstan, Qırğızıstan, Əfqanıstan, Bosniya və Herseqovina, Türkiyə, Hindistan və digər ölkələrdən alim, təhsil işçiləri və hökumət nümayəndələri daxil olmaqla 150-dən çox nümayəndə iştirak edib. Ölkəmizi ATİ-nin dekanı Nəsirulla Nəsirli, Azərbaycan Müəllimlər İnstitutunun prorektoru Tünzalə Yusifova və Naxçıvan Dövlət Universitetinin prorektoru Məmməd Rzayev təmsil ediblər. N.Nəsirli aqrar turizmdə yeni istiqamətlər və Azərbaycanda onun inkişaf perspektivləri mövzusunda məruzə ilə çıxış edib.

Keçirilmiş plenar iclasların birinə ATİ-nin rektoru C.Cəfərov rəhbərlik etmişdir. Həmin iclasda ABŞ-ın Ohayo Dövlət Universitetinin nümayəndəsi Dr. Ceki Qudvay “Gənclər idmanın təbliğinin inkişaf perspektivi”, Monqolustan Milli Universitetinin rektoru Timur-Oçir Sanjbegz “İpək Yolu və Monqolustanda turizm”, Pakistanın Preston İdarəetmə, Elm və Texnologiya İnstitutunun icraçı direktoru professor Asim Nazir Əhməd “Turizm iqtisadiyyatda davamlı inkişafın təminatçısıdır”, Qazaxıstanın əl-Fərabi adına Qazax Milli Universitetinin dekan müavini professor Erkin Kakimcanov “GİS üsulu ilə Almatıda turizm infrastrukturunun planlaşdırılması” mövzusunda məruzə ediblər.

ATİ nümayəndə heyəti sammitin təşkilatçısı olan Atatürk Universitetinin rəhbərliyi ilə də görüşüb, qarşılıqlı əlaqələrin daha da sıxlaşdırılması istiqamətində müzakirələr aparıb.