Turizm

Ana səhifə

Turizm

Dağıstan nümayəndə heyəti Azərbaycan regionlarının turizm imkanları ilə tanış olub

28 aprel 2012 12:55 (UTC +04:00)

Bakı. Nicat Mustafayev – APA-Economics. Azərbaycanda səfərdə olan Rusiya Federasiyası Dağıstan Respublikasının baş nazirinin müavini Rizvan Qazımaqomedovun rəhbərlik etdiyi nümayəndə heyəti bir sıra müəssisələrin fəaliyyəti ilə tanış olub. Azərbaycan İqtisadi İnkişaf Nazirliyindən «APA-Economics»ə verilən məlumata görə, Sumqayıt Texnologiyalar Parkının fəaliyyəti ilə tanışlıq zamanı nümayəndə heyətinə məlumat verilib ki, 17 zavoddan ibarət parkda müxtəlif çeşidli məhsullar, o cümlədən kabellər, transformatorlar, yüksək gərginlikli avadanlıq, hidroturbinlər, su nasosları, elektrik mühərrikləri, borular, texniki qazlar istehsal edilir.
Sumqayıt şəhərindəki «Azgüntex» zavodunda olan qonaqlara müəssisənin Avropanın aparıcı şirkətlərinin ən müasir texnologiyaları əsasında yaradıldığı və zavodda iki istehsal xəttinin - günəş modulları və LED lampaları xətlərinin fəaliyyət göstərdiyi bildirilib.
Dağıstan nümayəndə heyəti Binə qəsəbəsində yerləşən «Qrintek» istixana kompleksində də olub. Qonaqlara məlumat verilib ki, 10 hektar ərazidə fəaliyyət göstərən kompleksin yaradılmasında dövlətin güzəştli kreditlərindən istifadə edilib. Belə ki, ümumi dəyəri 10 mln. manat olan istixana kompleksinin yaradılmasına Sahibkarlığa Kömək Milli Fondu tərəfindən 5 mln. manat güzəştli kredit verilib. Müasir texnologiyalar əsasında fəaliyyət göstərən müəssisənin yaradılmasında Hollandiya istehsalı olan avadanlıqlardan istifadə edilib.
Qonaqlar həmçinin, Qəbələ rayonunda olub, bir sıra müəssisələrin fəaliyyəti, bölgənin turizm imkanları ilə tanış olublar. Qəbələ Konserv Zavodunda qonaqlara müəssisədə müasir standartlara cavab verən avadanlıqların quraşdırılması, burada müxtəlif növ meyvə pürelərinin, şirə, turşu, mürəbbə, cem və konsentratların istehsal olunması barədə məlumat verilib. Müəssisənin məhsulları dünyanın 35-dən çox ölkəsinə ixrac edilir.
Qəbələ Piano Fabrikində qonaqlara bildirilib ki, regionda analoqu olmayan və beynəlxalq standartlara tam cavab verən müəssisədə dünyada məşhur olan «Beltmann» markalı pianolar istehsal olunur və fabrikin yüksək keyfiyyətli piano və royallarına böyük tələbat var.
Qəbələ Hava Limanı ilə tanışlıq zamanı qonaqlara məlumat verilib ki, aeroport yüksək standartlara cavab verir və beynəlxalq statusa malikdir.
Eyni zamanda, Dağıstan nümayəndə heyətinə Qəbələdə beşulduzlu hotellər sistemi, rayonda yaradılmış müasir turizm infrastrukturu barədə geniş məlumat verilib.
Dağıstan nümayəndə heyəti bu gün Xaçmaz rayonunda da olacaq, burada fəaliyyət göstərən 6 min tonluq soyuducu anbar kompleksi və bölgənin turizm imkanları ilə tanış olacaqlar.

turizm