APA-nın “Reuters”ə istinadən verdiyi xəbərə görə, seçici bülletenlərinin 50%-nin yekunları belə deməyə əsas verir.
İlkin məlumatlara görə, Syriza Partiyası 300 yerlik parlamentdə 145 mandat əldə etməyə imkan verən 35,54% səs toplayıb. Onun əsas rəqibi mühafizəkar Yeni Demokratiya Partiyası 28,07% səs toplayıb.
Seçici fəallığı isə 55,4% olub.
Yunanıstan qanunvericiliyinə görə, seçkilərdə birincilik qazanan siyasi qüvvə avtomatik olaraq parlamentdəki yerlərin 50%-ni alır.
Yeni Demokratiya Partiyasının rəhbəri Vanqelis Meymarakis partiyasının məğlubiyyətini etiraf edərək “Syriza” rəhbəri Aleksis Siprası qələbə münasibətilə təbrik edib.
Ehtimallara görə, “Syriza” yenidən “Müstəqil yunanlar”la koalisiya qurmağı nəzərdən keçirə bilər.
Xatırladaq ki, yanvar ayındakı seçkilərlə müqayisədə “Syriza” 4 artıq mandat əldə edib.
Həmin vaxt cəmi 2 mandat çatışmazlığı təkbaşına hökumət qurmağa imkan verməmişdi.
Qeyd edək ki, Yunanıstanın baş naziri Aleksis Sipras avqustun 20-də bütün hökumətlə birgə istefaya getdiyini açıqlayaraq, bununla, parlamentə növbədənkənar seçkilərin keçirilməsini tezləşdirmək istədiyini bildirmişdi. Avqustun 27-də isə Yunanıstan prezidenti Prokopis Pavlopulos ölkə Konstitusiyasına əsasən, Ali Məhkəmənin sədri Vasilika Tanu Xrestofili baş nazir postuna təyin etmiş və müvəqqəti hökumətin formalaşdırılması səlahiyyətini vermişdi.
İyul ayında A. Sipras hökumətinin avropalı kreditorlarla Afinaya sərt iqtisadi tədbirlərin tətbiq edilməsi, vergilərin artırılması və genişmiqyaslı özəlləşdirmənin aparılması barədə anlaşması “Syriza”nın daxilində də parçalanmalara səbəb olmuşdu.
Belə ki, A. Siprasın Avropa İttifaqı ilə razılaşmasından narazı olan “Syriza”nın sol qolu seçkilər öncəsi Xalq Birliyi Partiyasını yaratdığını elan edib.
***
20 Sentyabr saat 11:04
APA-nın məlumatına görə, səsvermə saat 7.00-dan 19.00-dək davam edəcək.
Daxili İşlər Nazirliyinin məlumatına görə, seçici siyahılarında 9 milyon 873 nəfərin adı var. Konstitusiyaya görə, səsvermədə iştirak etmək vətəndaş üçün məcburi sayılır.
Qeyd edək ki, bu, 2015-ci ildə keçirilən üçüncü parlament seçkiləridir. İlk növbədənkənar seçkilər bu il yanvarın 25-də keçirilib. İyulun 5-də isə kreditorların tələbləri ilə bağlı referendum olub.
Parlament hakim Siriza Partiyasında - radikal solçuların koalisiyasında baş verən parçalanmadan sonra buraxılıb.
Narazılıq koalisiyanın lideri, baş nazir Aleksis Siprasın kreditorlarla yeni memorandum imzalanmaq niyyətindən sonra yaranıb. A. Sipras sərt iqtisadiyyat siyasətini davam etdirmək tərəfdarı olsa da, digər partiya üzvləri bunun partiyanın seçkiqabağı vədləri və proqramı ilə ziddiyyət təşkil etdiyini bildirib, əleyhinə çıxıblar.
Hakim koalisiya çoxluğu itirib və Sipras yeni seçkilərə getmək məcburiyyətində qalıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
