Xarici siyasət

Ana səhifə

Xarici siyasət

Azərbaycanın Yaponiyadakı səfiri Azər Hüseyn: “Yaponiya ilə iqtisadi əməkdaşlığın inkişafı iqtisadi diplomatiyamızın prioritet istiqamətlərindən biridir” - EKSKLÜZİV

21 may 2008 11:39 (UTC +04:00)

- Azərbaycan-Yaponiya əlaqələrinin indiki səviyyəsini və perspektivlərini necə qiymətləndirirsiniz?
- Azərbaycan Yaponiya ilə ikitərəfli əlaqələrə böyük əhəmiyyət verir. İki dövlət arasında diplomatik əlaqələr 1992-ci il sentyabrın 7-də qurulub. Möhkəm siyasi əlaqələrə malik olan Azərbaycan və Yaponiya qarşılıqlı hörmət, maraq və dostluğa əsaslanaraq müxtəlif sahələrdə əməkdaşlıq edir və bu əməkdaşlıq daim genişlənməkdədir. Azərbaycanın iqtisadi diplomatiyasının prioritet istiqamətlərindən biri dünyanın 2-ci iqtisadi gücü sayılan Yaponiya ilə iqtisadi əməkdaşlığın bütün istiqamətlər üzrə inkişaf etdirilməsidir. İki ölkə arasında turizm və mədəniyyət sahələrində əlaqələr də inkişaf edir. İldən ilə Yaponiyadan Azərbaycana yalnız iş adamlarının deyil, turistlərin səfərləri də artmaqdadır. 2007-ci ilin sentyabr ayında Tokio şəhərində Dünya Turizm Sərgisi keçirildi. İlk dəfə olaraq sərgidə Azərbaycanın Mədəniyyət və Turizm Nazirliyi ilə yanaşı, turizm şirkətləri də iştirak edərək ölkəmizin turizm potensialını Yaponiyada təqdim etdilər.
- Yapon neft-qaz şirkətləri Azərbaycanın enerji sektoruna investisiya qoyuluşunun həcmini genişləndirməyi planlaşdırırmı?
- Bildiyiniz kimi, “Əsrin müqaviləsi”ndə Yaponiyanın İNPEX və “İtochu”â…¦ şirkətləri pay sahibidirlər. Şübhəsiz ki, ölkəmizin istər Xəzər dənizində, istərsə də quruda sahib olduğu karbohidrogen yataqlarının istismarı strateji əhəmiyyət daşıyır. Yapon tərəfi hər zaman bu sahə üzrə Azərbaycana müxtəlif səpkili sərmayə qoyuluşlarında maraqlıdır. Biz çalışırıq ki, Yaponiya tərəfi həddindən artıq maraqlı olduğu neft-qaz sənayesi ilə yanaşı, ölkəmizin qeyri-neft sektorunun inkişafında, yüksək texnologiyaların, o cümlədən müxtəlif sahələrdə təcrübələrin əldə edilməsi istiqamətində də fəal iştirak etsin. Artıq yapon şirkətləri ölkəmizdə enerji sektoru ilə yanaşı, digər sənaye sahələrinə də maraq göstərməyə başlayıblar.
- Azərbaycanın kənd təsərrüfatı sahəsinə Yaponiyanın texniki yardımının artacağı gözlənilirmi?
- 1997-ci ildən başlayaraq ölkəmizdə ərzaq məhsuldarlığının artırılması üçün Yaponiya tərəfindən kənd təsərrüfatı sahəsinə “2 KR Qrant Yardımı” həyata keçirilməkdədir. Bu günə qədər 25 milyon ABŞ dollarından çox yardım göstərilib. Ötən ildən başlayaraq səfirliyin tövsiyələri əsasında Yaponiya kənd təsərrüfatının mərkəzi kimi tanınan Hokkaydo regionunun bir sıra mütəxəssislərinin iştirakı və Yaponiya Beynəlxalq Əməkdaşlıq Bankının yardımı ilə Azərbaycanın müxtəlif regionlarında kənd təsərrüfatının inkişafı sahəsində pilot proqram həyata keçirilir. Tədqiqat xarakterli səfərlər nəticəsində toplanmış məlumat, hesabat və dəyərləndirmələr Yaponiyanın işgüzar dairələrində istifadə olunaraq ölkəmizin kənd təsərrüfatı sahəsinə sərmayə qoyuluşu və ya işgüzar məqsədlə gələn yapon iş adamları üçün əlverişli sənəd rolunu oynayacaq.
- Yaponiyanın TRACECA layihəsinə qoşulacağı gözlənilirmi?
- Ötən əsrin sonundan etibarən Yaponiya diplomatiyası tərəfindən tarixi İpək Yolunun bərpası, bu yolun keçdiyi ölkələrlə əməkdaşlığın prioritet hesab edilməsinə qərar verilib. Bu istiqamətdə Yaponiya hökuməti tarixi İpək Yolunun bərpası üzrə bütün layihə və proqramlarda iştirak etmək əzmindədir. Digər tərəfdən isə TRACECA çərçivəsində maliyyələşdirilən layihələrə, o cümlədən seçilmiş nəqliyyat layihələrinin həyata keçirilməsinə Yaponiya tərəfi həm texniki yardım göstərir, həm də Asiya İnkişaf Bankı çərçivəsində həyata keçirilən layihələrdə iştirak edir. Yapon şirkətləri TRACECA regionunu əhatə edən bütün nəqliyyat layihələrində iştirak edib və bundan sonra da fəal iştirak etmək niyyətindədir.
- Yaxın vaxtlarda Yaponiyadan Azərbaycana və ya əks istiqamətdə dövlət və hökumət rəsmilərinin səfərləri planlaşdırılırmı?
- 2006-cı ilin martında Azərbaycan prezidenti cənab İlham Əliyev Yaponiyada rəsmi səfərdə olub. Prezidentimiz Yaponiyanın baş nazirini Azərbaycana rəsmi səfərə dəvət edib və bu səfərin həyata keçirilməsi nəzərdə tutulur. Eyni zamanda Azərbaycan xarici işlər nazirinin Yaponiyaya, eləcə də Yaponiya xarici işlər nazirinin Azərbaycana səfərləri ilə bağlı iş aparılır. Azərbaycan təhsil nazirinin də Yaponiyaya səfəri gözlənilir.
- Yaponiyada yaşayan azərbaycanlılara münasibət necədir? Onlar özlərini rahat hiss edirlərmi?
- Yaponiyada yaşayan azərbaycanlıların böyük qismini tələbələr təşkil edir. Eyni zamanda yapon şirkətlərində çalışan azərbaycanlılar və yaponlarla ailə həyatı quran vətəndaşlarımız da var. Yapon xalqı qonaqpərvər, mehriban və gülərüz xalqdır. Yaponiyada azərbaycanlılara münasibət yaxşıdır.