Azərbaycan və Rusiyanın əməkdaşlıq üzrə Parlamentlərarası Komissiyasının iclası keçirilir

Azərbaycan və Rusiyanın əməkdaşlıq üzrə Parlamentlərarası Komissiyasının iclası keçirilir
# 08 dekabr 2023 16:31 (UTC +04:00)

Dekabrın 8-də Milli Məclisdə Azərbaycan və Rusiyanın əməkdaşlıq üzrə Parlamentlərarası Komissiyanın 20-ci yubiley iclası keçirilir.

APA xəbər verir ki, yubiley iclasında hər iki ölkənin parlament nümayəndələri iştirak edirlər.

Milli Məclis sədrinin birinci müavini Əli Hüseynli Rusiya ilə ölkəmiz arasında qarşılıqlı münasibətlərin yüksək inkişaf tempinə toxunub. Əli Hüseynlinin sözlərinə görə, ölkələrimizin qarşılıqlı əməkdaşlığı dövlətlərimizin və xalqlarımızın maraqlarına uyğundur.

Əli Hüseynli bu ilin sentyabr ayında ölkəmizin həyata keçirdiyi antiterror tədbirləri nəticəsində Azərbaycanın öz suverenliyini tam şəkildə bərpa etməsini diqqətə çatdırıb.

Parlamentari onu da əlavə edib ki, Azərbaycan Prezidenti İlham Əliyevin dünən imzaladığı sərəncama əsasən, gələn ilin 7 fevralında ölkəmizdə növbədənkənar prezident seçkiləri keçiriləcək.

Əli Hüseynli çıxışının sonunda Qazaxda Azərbaycan və Ermənistan Baş nazirlərinin müavinlərinin delimitasiya məsələləri ilə bağlı görüşünün də əhəmiyyətini qeyd edib.

İclasda çıxış edən Rusiya Federasiyası Federal Məclisi Federasiya Şurası sədrinin birinci müavini Andrey Yatskin ölkələrimiz arasında qarşılıqlı əlaqələrin parlament səviyyəsində gücləndiyini qeyd edib. Rusiya ilə Azərbaycan arasında ticarət əlaqələrinin müsbət tendensiya ilə davam etdiyini diqqətə çatdıran Yatskin qeyd edib ki, ölkələrimizin regionları arasında əlaqələrin gücləndirilməsi nəticəsində 70-də artıq region bir-biri ilə sıx əməkdaşlıq edir.

O, Şimal-Cənub Beynəlxalq Nəqliyyat Dəhlizi layihəsinin uğurla həyata keçirildiyini vurğulayaraq Azərbaycan tərəfinə təşəkkürünü bildirib.

Gələn il keçiriləcək forumlara və görüşlərə yüksək əhəmiyyət verdiyini diqqətə çatdıran Yatskin vurğulayıb ki, həmin görüşlərdə hər iki ölkə parlamentlərinin nümayəndə heyətlərinin iştirakı ilə tədbirlərin keçirilməsi nəzərdə tutulur.

Yubiley iclasında “Azərbaycan Respublikasının Milli Məclisi ilə Rusiya Federasiyasının Federal Məclisi arasında parlamentlərarası əməkdaşlığın daha da inkişaf etdirilməsi və dərinləşdirilməsi”, “Azərbaycan Respublikası ilə Rusiya Federasiyası arasında ticarət-iqtisadi əməkdaşlığın möhkəmləndirilməsi meyilləri və perspektivləri”, “Azərbaycan-Rusiya regionlararası əməkdaşlığının təcrübəsi və inkişaf yolları”, “Dördüncü Avrasiya Qadınlar Forumuna hazırlıq” və “Azərbaycan Respublikasının Milli Məclisi ilə Rusiya Federasiyasının Federal Məclisi arasında əməkdaşlıq üzrə Parlamentlərarası Komissiyanın iyirmi birinci iclası” mövzusunda məruzələr dinləniləcək.

#
#

ƏMƏLİYYAT İCRA OLUNUR