Afrika

Ana səhifə

Afrika

Müəmmər Qəddafi: “Silahı yerə qoyan üsyançıları əfv edəcəyəm”

02 mart 2011 16:01 (UTC +04:00)

Bakı-APA. “Mən hələ 34 il əvvəl Liviyada hakimiyyəti xalqa vermişəm, xalq ölkəni Xalq Konqresləri vasitəsilə idarə edir”. APA-nın məlumatına görə, bu fikirləri Liviya lideri Müəmmər Qəddafi söyləyib. Liviya Cəmahiriyyəsinin yaranmasının 34-cü ildönümü tədbirlərində çıxış edən Qəddafi bildirib ki, ölkədə hakimiyyət xalqa məxsus olduğuna görə, heç kəs buna qarşı çıxa bilməz. O, istefa verməyəcəyini növbəti dəfə bəyan edib. O hakimiyyətə qarşı çıxan qüvvələrə silahı yerə qoyacaqları təqdirdə amnistiya vəd edib: “Kim silahı yerə qoysa və mənasız qan tökməkdən imtina etsə, onu əfv sözü verirəm”.

Qəddafi BMT Təhlükəsizlik Şurasının Liviya hökumətinin hərəkətlərini pisləyən qətnaməsini rədd edib: “Təhlükəsizlik Şurası bu qətnaməni faktları real şəkildə yoxlamaqla deyil, informasiya agentliklərinin yaydığı məlumatlar əsasında qəbul edib. Əgər BMT doğrudan təhqiqat aparsa, onda görər ki, qətnamə qanunsuzdur. BMT-nin hər hansı ölkənin daxilində baş verən hadisələrlə bağlı qətnamə qəbul etmək hüququ yoxdur. Biz artıq bu qətnamənin ləğv olunması üçün beynəlxalq məhkəməyə müraciət etmişik”.

Liviya lideri beynəlxalq birliyi ölkədə baş verən hadisələrə hərbi müdaxilə etməkdən çəkinməyə çağırıb: “Əgər ABŞ və NATO Liviyanın daxili işlərinə qarışsalar, minlərlə liviyalı vətəni uğrunda öləcək”. Xatırladaq ki, ABŞ_ın BMT-də daimi nümayəndəsi Syuzan Rays bəyan edib ki, ABŞ NATO üzrə müttəfiqləri ilə prosesə hərbi müdaxilə imkanlarını nəzərdən keçirir. Bundan əvvəl Böyük Britaniyanın baş naziri Devid Kemeron da Qəddafiəy qarşı beynəlxalq hərbi müdaxilə versiyasını istisna etməyib. Pentaqon nümayəndələri bildiriblər ki, ABŞ Liviya ətrafında öz hərbi dəniz və hərbi hava qüvvələrini cəmləşdirməyə başlayıb.

Xatırladaq ki, Liviya liderinin istefası tələbi ilə keçirilən aksiyalarda ölənlərin sayı 2 min nəfəri keçib, 4 mindən artıq liviyalı isə yaralanıb. Xarici ölkələr Liviyadakı vətəndaşlarını kütləvi şəklidə evakuasiya edirlər.