Afrika

Ana səhifə

Afrika

Liviya: Britaniyanın müdaxiləsi vəziyyəti daha da gərginləşdirir

22 aprel 2011 02:45 (UTC +04:00)

Bakı-APA. Liviyanın xarici işlər naziri Əbdül Alti əl-Obeydi deyib ki, Benqaziyə Britaniya hərbi mütəxəssislərinin göndərilməsi ilə ölkədə ki vəziyyətə mənfi təsir göstərəcək.

APA-nın bbc.com saytına istinadən verdiyi xəbərə görə, Əbdül Alti əl-Obeydinin sözlərinə görə hökumətə qarşı olan düşərgəyə hərbi müşavirlərin yardımı qarşıdurmanın uzanmasına xidmət edəcək.

“Mən əminəm ki, bombardmanın dayandırılması ilə yanaşı əsl atəşkəs liviyalıların arasında demokratiya, siyasi islahat, seçkilər və konstitusiya kimi mövzular ətrafında dialoqa təkan verərdi”, - deyib Əbdül Alti əl-Obeydi.

Liviya hökumətinin nümayəndəsinin sözlərinə görə, belə bir təqdirdə azad seçkilər və hətta polkovnik Qəzzafinin gələcək liderliyi də gündəliyə çıxarıla bilər.

Obeydi deyib ki, atəşkəs təşəbbüsü onun baş çəkdiyi bir çox ölkədə dəstəklənsə də, Fransa, İtaliya və Britaniya bu məsələyə fərqli münasibət göstərib.

Britaniya hökuməti müşavirlərin göndərilməsi haqda qərarını müdafiə edərək bildirir ki, bu addım mülki əhalinin qorunması barədə BMT qətnaməsinə uyğun şəkildə aparılıb.

Britaniyanın xarici işlər nazirliyi bildirir ki, Liviya hava məkanının uçuşlar üçün bağlı elan olunması yaxşı nəticələr versə də, artıq yetərli deyil.

Nazir Uilliam Heyq müxalifət istehkamı sayılan Benqaziyə göndərilən müşavirlərin döyüşlərdə iştirak etməyəcəyini vurğulayıb.