Afrika

Afrika

Somalidə kütləvi aclıq nəticəsində son üç ayda 29 min uşaq ölüb

05 avqust 2011 11:28 (UTC +04:00)

Bakı. Ramil Məmmədli – APA. Somalidə davam edən kütləvi aclıq nəticəsində 90 gün ərzində 29 min uşaq həyatını itirib.

APA-nın məlumatına görə, Somalidə davam edən son 60 ilin ən böyük quraqlığı ölkənin cənubunda vəziyyəti daha da kəskinləşdirib. Somalinin cənubunda fəaliyyət göstərən “Sərhədsiz həkimlər” təşkilatının xəstəxanasından verilən məlumatlara görə, yardıma ehtiyacı olan insanlar 100 kilometrlərlə yolu piyada gələrək özlərini cənub bölgəsində yeganə olan bu xəstəxanaya çatdırmağa cəhd edirlər. Səfalət elə həddə çatıb ki, bu şəxslərin 1,5 ABŞ dollar nəqliyyatda gediş haqqı ödəmək imkanı da yoxdur. ABŞ-ın ölkədə apardığı araşdırma nəticəsində bəlli olub ki, hazırda Somalidə 1,3 milyon uşağın həyatı təhlükədədir. Ümumilikdə isə 7,5 milyon insanın isə təcili köməyə ehtiyacı var.

Bu ölkədə fəaliyyət göstərən “Əl-Şabab” radikal dini qruplaşması isə yardımın Somalinin cənubuna çatdırılmasına imkan vermir.

Qeyd edək ki, BMT-nin ötən ay yaydığı məlumatında Afrikanın Efiopiya, Somali, Eritiriya, Keniya və Çibuti ölkələrində 12 milyon insanın həyatının təhlükədə olduğu açıqlanmışdı.