Aqrar-sənaye kompleksi

Ana səhifə

Azərbaycan «Beynəlxalq Yaşıl Həftə - 2010» sərgisində iştirak edəcək

13 yanvar 2010 13:33 (UTC +04:00)

Bakı. Nicat Mustafayev - APA-Economics. Bu ilin yanvar ayının 15-24-də Berlində (Almaniya) ənənəvi «Beynəlxalq Yaşıl Həftə - 2010» sərgisi keçiriləcək.

Azərbaycan İqtisadi İnkişaf Nazirliyindən «APA-Economics»ə verilən məlumata görə, 1926-cı ildən başlayaraq hər il keçirilən sərgidə kənd təsərrüfatı və yeyinti sənayesi məhsulları nümayiş olunur.

Avropanın ən iri sərgisi hesab olunan ənənəvi «Beynəlxalq Yaşıl Həftə»də Azərbaycan üçüncü dəfədir iştirak edir. Sərgidə Azərbaycanı İqtisadi İnkişaf və Kənd Təsərrüfatı nazirliklərinin, Azərbaycanda İxracın və İnvestisiyaların Təşviqi Fondunun (Azpromo), həmçinin 10-dan artıq iri şirkət nümayəndələri təmsil edəcək.

İqtisadi İnkişaf Nazirliyinin təşkilatçılığı ilə Azərbaycan üçün ayrılmış pavilyonda ölkədə istehsal olunan müxtəlif kənd təsərrüfatı və yeyinti məhsulları nümayiş olunacaq. Bundan başqa, sərgi iştirakçılarına Azərbaycan haqqında müxtəlif çap materialları, jurnallar, broşürlar, disklər paylanacaq.

«Beynəlxalq Yaşıl Həftə - 2010» sərgisi çərçivəsində elmi-praktiki konfransların və forumların keçirilməsi, həmçinin bioloji enerji, ekoloji təmiz məhsullar və sağlam qidalanma mövzularında müzakirələrin təşkili nəzərdə tutulur.

Sərgi çərçivəsində bir sıra mədəni tədbirlərin keçirilməsi də planlaşdırılır. Belə ki, sərginin Azərbaycan pavilyonunda milli musiqi səslənəcək, milli mətbəx təqdim olunacaq, çay dəsgahı təşkil ediləcək.

Qeyd edək ki, sərgidə 60-dan artıq ölkə iştirak edəcək.