Aqrar-sənaye kompleksi

Ana səhifə

Azərbaycan cins qaramalın alınmasına dair yeni tender keçirir

15 yanvar 2010 08:25 (UTC +04:00)

Bakı. Rəşad Süleymanov – APA-Economics. Azərbaycan Kənd Təsərrüfatı Nazirliyi yanında «Aqrolizinq» ASC cins qaramalın satın alınmasına dair tender elan edib. Bu barədə «APA-Economics»ə Tender Komissiyasından məlumat verilib.

Tender südlük və ətlik istiqamətli damazlıq cins heyvanların alınmasını nəzərdə tutur və üç lot üzrə keçirilir. Birinci lota 360 baş südlük Holştin-Friz (Qara-ala), ikinci lota 179 baş südlük-ətlik Şvis, üçüncü lota isə 300 baş südlük-ətlik Simmental və 21 baş ətlik Aberdin-Anguss cinsli düyənin alınması daxildir. Tender iştirakçıları müqavilə bağlandıqdan sonra 150 gün ərzində qaramalı ölkəyə gətirərək «Aqrolizinq» ASC-yə təhvil verməlidir.

Təkliflərin qiymətləndirilməsi zamanı aşağı qiymət, yüksək məhsuldarlıq, müqavilənin vaxtında yerinə yetirilməsi, anoloji işlərdə təcrübə, iddiaçının potensial maliyyə vəziyyəti, qaramalın sağlamlığına dair zəmanət, istehsalçının təminatları və digər öhdəliklər əsas götürüləcək.

Tenderdə iştirak haqqı 500 manatdır. İddiaçılar tenderdə iştirak etmək üçün sənədlərini (tender təklifi və 2%-lik bank təminatı istisna olmaqla) fevralın 17-dək, tender təklifini isə fevralın 25-dək «Aqrolizinq» ASC-nin mərkəzi ofisinə (Bakı şəh., Bakıxanov qəsəbəsi, Bünyadov küçəsi 12, Tel: (994 12) 425 64 39) təqdim etməlidir. Təklif zərfləri fevralın 26-da açılacaq.