Aqrar-sənaye kompleksi

Ana səhifə

Azərbaycan hökuməti «Arıçılıq sahəsində dövlət nəzarətinin həyata keçirilməsi Qaydası»nı təsdiq edib

28 yanvar 2010 07:48 (UTC +04:00)

Bakı. Rəşad Süleymanov – APA-Economics. Azərbaycan Nazirlər Kabineti «Arıçılıq sahəsində dövlət nəzarətinin həyata keçirilməsi Qaydası»nı təsdiq edib. Bu barədə «APA-Economics»ə Nazirlər Kabinetindən məlumat verilib.

Qaydalara əsasən, arıçılıq sahəsində dövlət nəzarəti Kənd Təsərrüfatı Nazirliyi tərəfindən öz səlahiyyətləri daxilində qanunvericiliklə müəyyən olunmuş qaydada həyata keçirilir. Dövlət nəzarəti bal arı cinsləri və populyasiyaları genofondunun qorunub saxlanılmasını, arıçılıq subyektləri tərəfindən müvafiq qanunvericiliyə, habelə arıçılığa dair normativ sənədlərin tələblərinə, baytarlıq qaydalarına riayət edilməsini, keyfiyyətli arıçılıq məhsulları istehsalının və dövriyyəsinin təmin olunmasını əhatə etməlidir.

Arıçılıq sahəsində dövlət nəzarətini həyata keçirən Kənd Təsərrüfatı Nazirliyinə bir sıra səlahiyyət verilib. Qaydalara əsasən, Nazirlik mülkiyyət formasından asılı olmayaraq, respublika daxilində fəaliyyət göstərən, arıçılıqla məşğul olan subyektlərin müvafiq qanunvericiliyin, o cümlədən arıçılığa dair normativ sənədlərin tələblərinin yerinə yetirilməsinə nəzarət etmək və qanunvericiliyi pozan şəxslər haqqında müəyyən edilmiş qaydada tədbirlər görə, arıçılıq subyektlərindən müvafiq məlumatlar ala, damazlıq arıçılıq sahəsində mübahisəli məsələlər üzrə ekspert rolunda çıxış edə, keyfiyyətinin təmin edilməsi üçün arı məhsullarından nümunələr götürə, arıçılıq mütəxəssislərindən və maddi-texniki vasitələrindən yoxlamanın məqsədləri üçün əvəzsiz istifadə edə bilər.

Arıçılıq təsərrüfatlarında yoxlamalar, araşdırmalar aparılarkən bu barədə arıçılıq subyektləri əvvəlcədən məlumatlandırılmalıdır. Yoxlamalar və araşdırmalar qanunvericiliklə müəyyən edilmiş hallarda və qaydada yalnız İqtisadi İnkişaf Nazirliyinin nümayəndəsinin iştirakı ilə həyata keçirilə bilər və yoxlama 10 gündən artıq davam edə bilməz. Zərurət yarandıqda, yoxlama müddəti səlahiyyətli orqanın rəhbərinin qərarı ilə 30 günə qədər artırıla bilər.