Aqrar-sənaye kompleksi

Ana səhifə

Azərbaycanda süd və yumurta istehsalı artıb, ət istehsalı azalıb

17 fevral 2010 14:49 (UTC +04:00)

Bakı. Nicat Mustafayev - APA-Economics. Bu ilin məhsulu üçün ötən ilin payızında Azərbaycanda 908,7 min hektar sahədə payızlıq dənli bitkilər əkilib. Bunun 659,3 min hektarını və yaxud 72,6%-ni buğda, 249,1 min hektarını və ya 27,4%-ni isə arpa əkinləri təşkil edib.

Dövlət Statistika Komitəsindən «APA-Economics»ə verilən məlumata görə, 2009-cu ildə «Aqrolizinq» xətti ilə təsərrüfatlara 478 ədəd traktor, 201 ədəd taxılyığan kombayn, 2 ədəd kartofyığan kombayn, 253 ədəd traktorla otbiçənlər, həmçinin 687 ədəd digər yığım və becərmə maşınları satılıb və lizinq yolu ilə verilib.

Bundan başqa, 2010-cu ilin yanvarında diri çəkidə 24,5 min ton ət, 106,6 min ton süd, 92,1 mln. ədəd yumurta istehsal edilib ki, nəticədə süd istehsalı 4,4%, yumurta istehsalı 6,2% artıb, ət istehsalı isə quşçuluq fabrikində istehsalın kəskin aşağı düşməsi nəticəsində 0,7% azalıb. Həmin quşçuluq fabrikinin göstəriciləri nəzərə alınmazsa, ət istehsalı keçən ilin yanvar ayına nisbətən 2,8% artmış olardı.

Yanvar ayında keçən ilin müvafiq dövrü ilə müqayisədə kənd təsərrüfatının ümumi məhsulunun sabit qiymətlərlə dəyəri 2%, o cümlədən heyvandarlıq məhsulları 1,9%, tərəvəz və sair bitkiçilik məhsulları isə 5,5% artıb.

Hesabat ayında balıqçılıqla məşğul olan təsərrüfatlar tərəfindən 10 min manat dəyərində balıq ovlanıb. Ötən il ərzində isə 416,3 mln. ədəd vətəgə əhəmiyyətli balıq körpələri təbii su hövzələrinə və anbarlarına buraxılıb. Təbii su hövzələri və anbarlara buraxılmış balıq körpələrinin 96,8%-ni çəkikimilər təşkil edib.

Ötən ilin nəticəsi üzrə 65 hüquqi və fiziki şəxs tərəfindən balıq ovuna verilmiş 2 670 ton kvotaya qarşı 1 202 ton balıq ovlanıb. Ovlanmış balığın 18 tonu şamayı, 41 tonu kütüm, 79 tonu siyənək, 72 tonu çapaq, 39 tonu külmə, 27 tonu sıf, 839 tonu kilkə balıqlarının, 9 tonu çəki, 78 tonu isə kefal, dabanbalığı, xəşəm, naxa, qarasol və digər balıq növlərinin payına düşüb. Verilmiş kvotaya görə il ərzində 17,1 min manat ödənilib.