Aqrar-sənaye kompleksi

Ana səhifə

Kənd Təsərrüfatı Nazirliyi: Azərbaycanda taxıl qıtlığının yaranmaması üçün hökumət zəruri tədbirlər görəcək

02 mart 2010 12:21 (UTC +04:00)

Bakı. Rəşad Süleymanov – APA-Economics. Azərbaycanda taxıl əkilmiş sahələrin azalmasına baxmayaraq hökumət 2010-cu ildə ölkədə taxıl qıtlığının yaranmaması üçün zəruri tədbirlər həyata keçirəcək. Bunu «APA-Economics»ə Kənd Təsərrüfatı Nazirliyi bitkiçilik və toxumçuluq şöbəsinin müdiri Sabir Vəliyev bildirib.

S.Vəliyevin sözlərinə görə, aparılan ilkin araşdırmalar taxıl sahələrinin azalması müqabilində pambıq, tərəvəz, yem bitkiləri, kartof, bostan və tərəvəz əkilmiş sahələrin artdığını göstərib.

«Bu il ölkədə həm özəl şirkətlər, həm də Dövlət Taxıl Fondu tərəfindən taxıl elevatorları tikilir. Eyni zamanda, idxalı da nəzərə almaqla hökumət ölkədə taxıl əkininin azalmasını əsas tutaraq taxılın və unun qiymət artımına yol verməyəcək», - deyə nazirlik rəsmisi vurğulayıb.

S.Vəliyevin cari il üçün ölkədə taxıl sahələrinin 143 min ha azaldığını, bunun da Maliyyə Nazirliyi tərəfindən bəzi rayonlarda subsidiyaların verilməsində yaranmış ləngimələrlə izah edib.

Nazirlik rəsmisi qeyd edib ki, ötən il ölkədə həddən artıq taxıl istehsal olunduğundan fermerlər məhsulu satmaqda çətinliklə üzləşib. Bu il istehsal olunan taxılın satışının təşkili üçün də müəyyən tədbirlər nəzərdə tutulur.

Qeyd edək ki, Azərbaycanda 2009-cu ildə qarğıdalı da daxil olmaqla 1 125,4 min hektar sahədən, hər hektardan orta hesabla 26,6 sentner olmaqla 2 988,3 min ton taxıl məhsulu toplanılıb ki, 2008-ci ilə nisbətən onun istehsalı 19,6% artıb. İstehsal olunmuş taxıl məhsulunun 71,7%-ni və ya 2 141,4 min tonunu buğda təşki edib.