Aqrar-sənaye kompleksi

Ana səhifə

Azərbaycandan Dmanisiyə yeni kənd təsərrüfatı texnikası göndərilib

12 mart 2010 15:10 (UTC +04:00)

Dmanisi. Nizami Məmmədzadə - APA. Gürcüstanda səfərdə olan Azərbaycan kənd təsərrüfatı nazirinin müavini İlham Quliyev bu gün Dmanisidə olub.

APA-nın Gürcüstan bürosunun məlumatına görə, İ.Quliyev dünən Gürcüstan Kənd Təsərrüfatı Nazirliyində bir sıra görüşlər keçirib, Kvemo-Kartli bölgəsinin qubernatoru David Kirkitadze ilə görüşüb.

Bu gün Dmanisi rayon İcra Hakimiyyətinin başçısı Bakur Mqeladze ilə keçirdiyi işgüzar görüşdən sonra nazir müavini jurnalistlərə bildirib ki, Azərbaycan dinamik inkişaf etdikcə dost ölkəyə, o cümlədən burada yaşayan soydaşlarımıza kömək etməyə çalışır: “Bilirik ki, soydaşlarımızın texnika sarıdan çətinlikləri var. Mütəxəssislərimiz öncə bu çətinlikləri araşdırıb öyrəndikdən sonra soydaşlarımıza kömək etmək qərarına gəldik. Hesab edirəm ki, belə tədbirlərin həyata keçirilməsi burada yaşayan azərbaycanlıların güzəranının yaxşılaşmasına kömək edəcək. Gətirdiyimiz texnikaların içində Gəncə Avtomobil Zavodunda yığılmış 6 ədəd traktor da var. Gələcəkdə lazım gələrsə, soydaşlarımıza texnikadan başqa, gübrə və müxtəlif toxumlarla təchiz edəcəyik”.

Azərbaycanda fəaliyyət göstərən “Aqrolizinq” ASC-nin sədri Əli Bayramov APA-ya açıqlamasında yerli “Bazalt” şirkəti ilə iki illik müqavilə bağladıqlarını bildirib: “Buraya tələbata uyğun kombayn, otbiçən və otbağlayan, kartof səpən texnika da gətirəcəyik. Məqsədimiz qazanc yox, yerli əhaliyə kömək etməkdir. Buna görə də texnikadan istifadə taarifləri çox aşağı olacaq. Dmanisiyə hələlik 600 min dollarlıq texnika gətirməyi nəzərdə tutmuşuq”.

Dmanisi RİH-in başçısı Bakur Mqeladze isə APA-ya açıqlamasında göstərilən yardıma görə Azərbaycan hökumətinə minnətdarlığını bildirib.