Aqrar-sənaye kompleksi

Ana səhifə

İqtisadi və Sosial İnkişaf Mərkəzi kənd təsərrüfatının inkişafının qiymətləndirilməsi ilə bağlı konsepsiya hazırlayıb

15 mart 2010 10:21 (UTC +04:00)

Bakı. Elnur Hüseynquluyev - APA-Economics. Bu gün Bakıda İqtisadi və Sosial İnkişaf Mərkəzinin (İSİM) “Azərbaycan Respublikasında kənd təsərrüfatının inkişafının qiymətləndirilməsi və təkliflər üzrə konsepsiya layihəsi»nin təqdimatı keçirilib.

«APA-Economics»in məlumatına görə, tədbirdə İSİM-in İdarə Heyətinin sədri Vüqar Bayramov sənəd haqqında iştirakçılara geniş məlumat verib.

V.Bayramovun sözlərinə görə, son illər ölkədə aqrar sektorda inkişaf meylləri müşahidə edilir: “Bununla belə, kənd təsərrüfatı sektorunun ÜDM-də payı az olaraq qalmaqdadır. Bunun səbəblərindən biri neft sektorunun inkişafı nəticəsində ÜDM-də qeyri-neft sektorunun nisbi payının azalması ilə əlaqədar olsa da, digər səbəb aqrar sektorda formalaşan yeni dəyərin məbləğinin az olması ilə bağlıdır”.

V.Bayramov həmçinin bildirib ki, Azərbaycan Maliyyə Nazirliyi subsisiyaların verilməsində nöqsanların və bir sıra rayonlarda yerli icra hakimiyyəti orqanlarının müdaxiləsinin olduğunu aşkara çıxarıb: “Belə nöqsanlar subsidiyaların əhəmiyyətini və onların aqrar sektora pozitiv təsirlərini azaldır. Bu görə də subsidiyaların verilməsinə nəzarətin gücləndirilməsi və bu yardımların verilməsi üzrə qaynar xəttin yaradılmasına ehtiyac var.

V.Bayramov bu problemlə bağlı fermerin sahib olduğu əkin sahəsinə görə subsidiyaların bölüşdürülməsi mexanizminin dəyişdirilməsini qeyd edib: “Hazırda yeganə meyar kimi məhz fermerin sahib olduğu əkin sahəsi götürülür, bu isə sisidiyalarla fermerin istehsal etdiyi məhsul arasında əlaqəni formalaşdıra bilmir. Subsidiyaların həcmi müəyyənləşdirilən zaman fermerin əvvəlki ildə istehsal etdiyi məhsulun həcminin də əsas götürülməsi məqsədəuyğun hesab edilməlidir”.

Təklifdə həmçinin dolayı subsidiyaların tətbiqi və həyata keçirilməsi, taxıl və pambıq yığımına nail olmaq üçün subsidiya xərclərinin müvafiq olaraq 1,5-2 dəfə artırılması, kənd təsərrüfatı anbarlarının tikintisinin sürətləndirilməsi, həmçinin kənd təsərrüfatı məhsullarının sığortalanması mexanizminin təkmilləşdirilməsi və fermerlərin fəaliyyətinə yersiz müdaxilələrin aradan qaldırılması məsələləri qeyd olunub.