Aqrar-sənaye kompleksi

Ana səhifə

Azərbaycan Kənd Təsərrüfatı Nazirliyi ilə FAO arasında iki layihənin maliyyələşdirilməsinə dair müqavilə imzalanıb

18 mart 2010 15:24 (UTC +04:00)

Bakı. Rəşad Süleymanov - APA-Economics. Bu gün Azərbaycan Kənd Təsərrüfatı Nazirliyi (KTN) ilə BMT-nin Ərzaq və Kənd Təsərrüfatı Proqramı (FAO) arasında iki layihənin maliyyələşdirilməsinə dair müqavilə imzalanıb.

«APA-Economics»in məlumatına görə, müqaviləni Azərbaycan tərəfdən kənd təsərrüfatı naziri İsmət Abasov, FAO tərəfindən isə təşkilatın subregional ofisinin rəhbəri Mustafa Seneser imzalayıb.

İ.Abasov bildirib ki, büdcəsi 385 min ABŞ dolları olan, FAO tərəfindən maliyyələşdirilən və iki il müddətində həyata keçiriləcək birinci layihənin əsas məqsədi Azərbaycanın Bitki Genetik Ehtiyatları (BGE) sahəsində fəaliyyət göstərən KTN-in Elmi-Tədqiqat Əkinçilik İnstitutu və Azərbaycan Milli Elmlər Akademiyasının Genetik Ehtiyatlar İnstitutunun milli bitki seleksiyası və biotexnoloji imkanlarının gücləndirilməsindən ibarətdir: «Bu layihə kənd təsərrüfatı üçün mühüm olan 3-4 prioritet bitkini - buğda, kartof, nar, tərəvəz bitkiləri müəyyənləşdirəcək və bu bitkilərin yerli mühitə yaxşı adaptasiya olunmuş yeni məhsuldar, xəstəlik və stressə davamlı sortlarının inkişafını təmin edəcək. Bu sortların realizə olunması məhsuldarlığı artıraraq, xüsusilə kəndlərdə məskunlaşan əhalini daha çox qida və gəlirlə təmin edəcək».

Layihə çərçivəsində ənənəvi və biotexnoloji üsullar vasitəsilə BGE-nin səciyyələndirilməsi və seleksiyası ilə bağlı 13 təlim kursu keçiriləcək. BGE istifadə sahəsində tətbiq olunan müasir metod və üsullara yiyələnmək məqsədilə yerli tədqiqatçılardan ibarət qrupun Macarıstanın BGE və Seleksiya İnstitutlarına səfəri təşkil olunacaq. Layihə fəaliyyətlərinin həyata keçirilməsi məqsədilə 4 milli məsləhətçi müqavilə əsasında işə cəlb olunacaq və qeyd olunan 2 elmi-tədqiqat institutu molekulyar seleksiya işlərinin aparılması üçün müasir avadanlıqlarla (120 min ABŞ dolları) təchiz olunacaq, BGE-dan İstifadə üzrə Milli Strategiya inkişaf etdiriləcək.

İkinci layihə isə FAO-nın “Qafqazda və Mərkəzi Asiyada köçəri və digər çəyirtkə ziyanvericilərinə nəzarətin yaxşılaşdırılması” Regional Layihəsidir. Büdcəsi 322 min ABŞ dolları olan, FAO tərəfindən maliyyələşdirilən bu layihə iki il müddətində həyata keçiriləcək və 9 ölkəni əhatə edəcək (Azərbaycan, Ermənistan, Gürcüstan, Əfqanıstan, Qazaxıstan, Qırğızıstan, Özbəkistan, Tacikistan və Türkmənistan). Bu layihənin əsas məqsədi regional əməkdaşlığın və potensialın möhkəmləndirilməsi vasitəsilə Qafqazda və Mərkəzi Asiyada çəyirtkələrə qarşı mübarizənin milli və regional səviyyədə yaxşılaşdırılmasından ibarətdir.