Aqrar-sənaye kompleksi

Ana səhifə

İhsan Fatoğlu: «Azərbaycan ƏDV-ni bərpa etməsəydi, çörəyin qiyməti daha da enə bilərdi»

19 mart 2010 08:19 (UTC +04:00)

Bakı. Rəşad Süleymanov – APA-Economics. Ötən ilin may ayından Azərbaycana idxal olunan taxıla əlavə dəyər vergisinin tətbiqinin bərpası çörəyin qiymətinin ucuzlaşmasının qarşısını alıb. Bunu «APA-Economics»ə açıqlamasında «Fatoğlu İstehsal Azərbaycan» şirkətinin baş direktoru İhsan Fatoğlu bildirib.

İ.Fatoğlunun sözlərinə görə, ƏDV-nin tətbiqi unun qiymətinə eyni səviyyədə təsir göstərib: «Ancaq dünya bazarlarında taxılın qiymətinin aşağı düşməsi ƏDV-nin tətbiqinə baxmayaraq çörəyin qiymətinin artmasına da imkan vermədi. ƏDV olmasaydı çörəyin qiyməti daha da enə bilərdi».

İ.Fatoğlu onu da qeyd edib ki, hazırda unun 50 kq-lıq standart kisəsinin qiyməti əvvəlki illərdə ƏDV-siz 23-24 manat olduğu halda, hazırda ƏDV ilə birgə 14-15 manat təşkil edir.

Şirkət rəhbəri 3 il əvvəl dünyada taxılın qiymətində ciddi artımın olduğunu, 1 ton taxılın qiymətinin 100 dollardan 350-400 dollaradək yüksəldiyini qeyd edib. Hazırda taxıl idxal edən ölkələrə sərhəddə təhvil prinsipi ilə 150-200 dollar arasında başa gəlir.

İ.Fatoğlu un istehsalı üçün buğdanın bir hissəsinin ölkə daxilindən tədarük olunduğunu qeyd edib. Şirkət 2009-cu ildə un istehsalı üçün 15 min ton yerli taxıl, 60 min ton idxal taxıldan istifadə edib: «Bəzi illərdə bu rəqəm dəyişir, bu da Azərbaycanda istehsal olunan taxılın keyfiyyətindən asılıdır. Son iki ildə fermerlərin aldığı toxumların keyfiyyətinin yüksək olması nəticəsində keyfiyyətli məhsul da artıb. Bu il istehsalımızın 1/3-dən çox hissəsini yerli bazardan təmin etmək niyyətindəyik. Onu da qeyd edim ki, yerli taxıldan keyfiyyətli un almaq bu gün xaricdən idxal olmadan mümkün deyil».

Qeyd edək ki, «Fatoğlu» şirkətinin Gəncə şəhərində fəaliyyət göstərən dəyirmanlarının günlük istehsal gücü 300 ton, illik istehsal gücü isə 75 min tondur. Şirkət yerli bazarın un və unlu məmulatlarla təminatında iştirak edir.