Aqrar-sənaye kompleksi

Ana səhifə

Azərbaycan Avstriyadan cins qaramalın ilk partiyasını apreldə alacaq

01 aprel 2010 10:54 (UTC +04:00)

Bakı. Rəşad Süleymanov – APA-Economics. «Aqrolizinq» ASC-nin Avstriyadan aldığı cins qaramalın ilk partiyası aprelin 20-dək Azərbaycana gətiriləcək. Bu barədə «APA-Economics»ə «Aqrolizinq» ASC-nin tingçilik, toxumçuluq və damazlıq heyvandarlıq şöbəsinin müdiri Kamil Şamilov məlumat verib.

K.Şamilovun sözlərinə görə, «Aqrolizinq», Kənd Təsərrüfatı Nazirliyi və Dövlət Baytarlıq Xidmətinin əməkdaşlarından ibarət nümayəndə heyəti bu yaxınlarda Avstriyada olaraq 300 baş cins inək seçib. Bunların 150 başı Simmental, qalanı isə Şviss cinsdən olan inəklərdir. Heyvanlar Azərbaycanda 20 gün karantində saxlanıldıqdan sonra fermerlərə lizinqə verəiləcək.

«Bu partiya cins inəklərin qiyməti ötən il Almaniyadan alınmış inəklərin qiymətindən ucuz olacaq», - deyən «Aqrolizinq» nümayəndəsi bildirib ki, qiymətlər malın diri çəkisinə əsasən hesablandığından indidən 1 inəyin neçəyə başa gələcəyi barədə konkret demək olmur.

K.Şamilov onu da əlavə edib ki, yay ayları havaların isti keçməsi ilə əlaqədar olaraq heyvanların növbəti partiyalarının Azərbaycana gətirilməsinə avqust ayından başlanacaq. Ümumilikdə il ərzində «Aqrolizinq» ASC-nin xətti ilə Azərbaycana Avstriyadan 900 baş cins inəyin gətirilməsi planlaşdırılır.

Şərtlərə əsasən, heyvanların qiymətinin 50%-i dövlət tərəfindən güzəşt olunur. Fermerlər vəsaitin digər 50%-nin yarısını əvvəlcədən, qalan hissəsini isə 3 il ərzində hissə-hissə ödəməlidir.

Qeyd edək ki, ötən il Almaniyadan alınmış 1 heyvanın qiyməti təxminən 3600-3800 manat təşkil edib.