Aqrar-sənaye kompleksi

Ana səhifə

SOS: Azərbaycanın Qarabağ bölgəsində dabaq xəstəliyi arta bilər

07 aprel 2010 15:30 (UTC +04:00)

Bərdə. Teymur Zahidoğlu - APA. Azərbaycanın Qarabağ bölgəsində dabaq xəstəliyinin yayılması ehtimalı artır. Bu barədə APA-nın Qarabağ bürosuna bölgədə fəaliyyət göstərən baytarlar məlumat verib.

Onların sözlərinə görə, artıq mal-qaranın vaxtından əvvəl dabaq əleyhinə peyvəndləmə işlərinə başlanıb. Xüsusilə yaz aylarında özünü daha çox büruzə verən bu xəstəliyə qarşı ildə iki dəfə dövlət tərəfindən vaksin və digər preparatlar ayrılsa da, yoluxmanı tam aradan qaldırmaq mümkün olmur. Bunun əsas səbəbi isə bazarlardır. Belə ki, bəzən tam nəzarət altında olan yaşayış məntəqələrinə bir həftə ərzində bir neçə mal-qara bazarından çoxlu sayda iri və xırda buynuzlu heyvan alınıb gətirilir. Bunların əksəriyyəti isə peyvəndlənməmiş olur. Nəticədə daşıdıqları xəstəliklər qısa müddət ərzində immuniteti zəif canlılar arasında yayılmağa başlayır.

Baytar həkimlərin sözlərinə görə, heyvanların alqı-satqı mərkəzlərində satışa çıxarılan hər bir heyvanın baytar həkimindən müvafiq sağlamlıq və qeydiyyat arayışı olmalıdır. Eyni zamanda mal-qara bazarlarında baytar-buraxılış məntəqələri olmalı və satışa çıxarılan heyvanlar həkim rəyindən sonra alqı-satqı yerlərinə buraxılmalıdır.

APA-nın Qarabağ bürosunun araşdırmalarına görə, bölgədə ən iri mal-qara bazarı Bərdədə yerləşir. Hər həftənin cümə günü bura sayı 10 min başı üstələyən iri və xırda buynuzlu, eləcə də başqa ev və yük heyvanları gətirilir. Buna rəğmən, Bərdə mal-qara bazarında baytar-buraxılış məntəqəsi, heyvanların müayinəsi üçün yer və ekstremal şəraitlərdə dezinfeksiya baryerlərinin qurulması üçün şərait yoxdur. Həmçinin alqı-satqı prosesləri də tərəflər arasında rəsmi razılaşma olmadan aparılır.

Bərdə rayon Baytarlıq İdarəsindən APA-nın Qarabağ bürosuna bildirilib ki, rayon ərazisində fəaliyyət göstərən mal-qara bazarında baytar-buraxılış məntəqəsinin qurulması üçün aidiyyəti qurumlara rəsmi qaydada dəfələrlə müraciət olunmasına baxmayaraq, illərdir məsələ həllini tapmamış qalır.

APA-nın araşdırması nəticəsində məlum olub ki, heyvanların bazarlarda rəsmi razılaşma olmadan satılması həm də oğurluq hallarının artmasına zəmin yaradır. Bərdə rayon Polis Şöbəsinin rəisi, polis polkovniki Ağalar Məhərrəmov APA-nın Qarabağ bürosuna bildirib ki, bərdəli asayiş keşikçilərinin çevikliyi nəticəsində mal-qara bazarında dəfələrlə oğurluq heyvanların satılmasının qarşısı alınıb. Xüsusilə ətraf rayonlardan gətirilmiş oğurluq heyvanlar barədə həmin rayonların polis şöbələrindən tez-tez məlumatlar daxil olur və oğurlanmış mal-qaranın sahibinin Bərdə bazarına gətirilməsi şərti ilə əməliyyat-axtarış tədbirləri keçirilir.