Aqrar-sənaye kompleksi

Ana səhifə

Bu ilin I rübündə Azərbaycanda ət istehsalı azalıb

19 aprel 2010 08:04 (UTC +04:00)

Bakı. Rəşad Süleymanov – APA-Economics. Bu ilin aprel ayının 1-i vəziyyətinə Azərbaycanda ilin əvvəlindən 102,8 min hektarda yazlıq bitkilər əkilib. Dövlət Statistika Komitəsindən «APA-Economics»ə verilən məlumata görə, bunun 7,9 min hektarını dənli və dənli paxlalı bitkilər (qarğıdalısız), 31,3 min hektarını kartof, 23,9 min hektarını tərəvəz bitkiləri, 4 min hektarını ərzaq üçün bostan bitkiləri, 28,3 min hektarını çoxillik otlar, 3,9 min hektarını şəkər çuğunduru və s. kənd təsərrüfatı bitkiləri təşkil edib. Ötən ilin müvafiq dövrünə nisbətən dən üçün günəbaxan əkini 38,6%, tərəvəz bitkiləri əkini 2,7%, ərzaq üçün bostan bitkiləri əkini 41,3%, şəkər çuğunduru əkini 16,3% çox sahədə aparılıb. Ümumi əkinin 57,6%-ni və yaxud 59,2 min hektarını kartof, tərəvəz və bostan bitkiləri, 27,6%-ni və ya 28,4 min hektarını yem bitkiləri təşkil edib.

Təsərrüfatlarda yanvar-mart aylarında 7,3 min ton və yaxud keçən ildəkindən 20,1% çox istixana və faraş tərəvəz məhsulları istehsal edilib.

Cari ilin birinci rübündə diri çəkidə 71,4 min ton ət, 332,7 min ton süd, 298 mln. ədəd yumurta istehsal edilib. Əvvəlki ilin müvafiq dövrü ilə müqayisədə süd istehsalı 4,1% və yaxud 13 min ton, yumurta istehsalı 2,6% və yaxud 7,6 mln. ədəd artıb, ət istehsalı isə 1,4% və yaxud 1 013 ton azalıb. Ət istehsalının azalmasına və yumurta istehsalı üzrə artım sürətinin aşagı düşməsinə quşçuluq fabrikləri mənfi təsir göstərib. Belə ki, quşçuluq fabrikləri nəzərə alınmadan 2009-cu ilin müvafiq dövrünə nisbətən ət istehsalı 2,7%, yumurta istehsalı 7,6% artıb.

Aprelin əvvəlinə ölkə üzrə 2 618,6 min baş qaramal, o cümlədən 1 258,5 min baş inək və camış, 8 595,3 min baş qoyun və keçi olub. Aprelin 1-i vəziyyətinə qaramalın sayı 1,7%, inək və camışların sayı 1,2%, qoyun və keçilərin sayı 1,5% artıb.

Quşçuluq fabriklərində 2009-cu il aprelin 1-nə nisbətən quşların sayı 14% və yaxud 1,1 mln., o cümlədən yumurtlayan toyuqların sayı 12,1% azalıb. Yanvar-mart aylarında quşçuluq fabriklərində 7,2 min ton yaxud 27,6% az quş əti, 2,7% az yumurta istehsal olunub. Yanvar-mart aylarında ölkəyə idxal edilən quş ətinin 2009-cu ilin yanvar-mart aylarına nisbətən 33,2%, yumurtanın 15,4% azalmasına baxmayaraq, bəzi hallarda quşçuluq fabriklərində göstərilən məhsulların satışı və istehsalının təşkilindəki çətinliklərlə əlaqədar ümumilikdə istehsalın səviyyəsi aşağı düşüb.

Ümumilikdə, 2010-cu ilin birinci rübündə müvafiq hesablamalara görə kənd təsərrüfatının ümumi məhsulunun faktiki qiymətlərlə dəyəri 336,5 mln. manat olub və keçən ilin eyni dövrünə nisbətən 1,5% artıb.

Hesabat dövründə meşəçilik təsərrüfatlarında istehsal edilmiş məhsul və xidmətlərin faktiki qiymətlərlə dəyəri 332 min manat, balıqçılıq təsərrüfatlarında tutulmuş balıq və xidmətlərin dəyəri 40 min manat təşkil edib.