Aqrar-sənaye kompleksi

Ana səhifə

«Dəvəçi Broyler» ASC ISO 22000:2005 beynəlxalq sertifikatı alıb

27 aprel 2010 10:23 (UTC +04:00)

Bakı. Elnur Hüseynquluyev - APA-Economics. Bu gün Bakıda «Dəvəçi Broyler» ASC-nin «Qida məhsullarının təhlükəsizliyi menecmenti sistemi» olan ISO 22000:2005 beynəlxalq sertifikatını alması ilə bağlı mətbuat konfransı keçirilib.

«APA-Economics»in məlumatına görə, ASC-nin baş direktoru Zakir Əzimov şirkətdə beynəlxalq İSO 22000:2005 - yeyinti məhsullarının təhlükəsizliyi standartının tətbiqinə 2007-ci ilin sonlarından başlandığını bildirib.

Z.Əzimovun sözlərinə görə, iki il davam edən və ümumilikdə 7 mərhələdən ibarət olan sertifikatın tətbiq olunması prosesində şirkətin istehsal prosesindəki bütün kritik nöqtələr müəyyən olunub və xüsusi müəyyən olunmuş işçi HACCP qrupu tərəfindən nəzarətə götürülüb. Müəssisədə bununla bağlı mütəmadi olaraq beynəlxalq konsultasiya şirkətinin mütəxəssislərinin iştirakı ilə müxtəlif təlim kursları və seminarlar keçirilib, istehsalat prosesinin təkmilləşdirilməsi işi aparılıb: “Beləliklə, bütün bunların nəticəsi olaraq bu ilin əvvəlində Almaniyanın TÜV Thüringen beynəlxalq audit təşkilatının yeyinti məhsulları üzrə baş auditoru Marco Hoffmanın başçılığı ilə audit komandasının apardığı 5 günlük auditdən sonra “Dəvəçi Broyler” Azərbaycanda ilk quş əti istehsalçısı olaraq İSO 22000:2005 sertifikatına layiq görüldü”.

Z.Əzimov sözügedən sertifikatın alınmasının «Səba» məhsullarını dünya bazarına çıxarmaq yolunda önəmli bir addım olduğunu qeyd edib. Hazırda müəssisədə ən azı 100 çeşiddə məhsul istehsal edilməsi nəzərdə tutulur ki, bu da başlıca olaraq quş ətinin dərin emalı hesabına əldə ediləcək.

Tədbirdə həmçinin Azərbaycan İnvestisiya Şirkətinin (AİŞ) icraçı direktor müavini Zaur Məmmədov AİŞ-in fəaliyyəti və əsas məqsədləri barədə danışıb. Onun sözlərinə görə, AİŞ 2008-ci ildən etibarən «Dəvəçi Broyler» ASC-nin səhmlərində 25%-lik paya malikdir. Həmin vaxtdan indiyədək AİŞ tərəfindən şirkətə investisiya yatırımları həyata keçirilib. Bu investisiyaların yatırılmasında əsas məqsəd «Dəvəçi Broyler» ASC-nin istehsalının gücləndirilməsi və ixrac imkanlarının artırılmasıdır.