Aqrar-sənaye kompleksi

Ana səhifə

Azərbaycanda 2010-2013-cü illərdə qida məhsulları üzrə 253 yeni standart qəbul ediləcək

11 may 2010 10:49 (UTC +04:00)

Bakı. Nicat Mustafayev - APA-Economics. Azərbaycan Standartlaşdırma, Metrologiya və Patent üzrə Dövlət Komitəsi tərəfindən yeni yaradılmış qida məhsulları üzrə Texniki Komitənin 2010-2013-cü illər üzrə fəaliyyət planı təsdiq edilib.

Komitədən “APA-Economics”ə verilən məlumata görə, bu müddət ərzində qida məhsulları üzrə 253 yeni standartın hazırlanması və təsdiqi planlaşdırılır. Bura uşaq qidaları, ət, balıq və onların məhsulları, şəkər və qənnadı məmulatları, alkoqollu və alkoqolsuz içkilər, yağ, qida əlavələri və digər məhsullar üzrə standartlar daxildir. Bu standartlar İSO, CEN və “Kodex Alimentarius” beynəlxalq standartları əsasında hazırlanacaq.

Qida məhsulları üzrə Texniki Komitənin bu sahədəki fəaliyyətində Azərbaycan Səhiyyə və Kənd Təsərrüfatı nazirlikləri, həmçinin qida sənayesi sektorunda fəaliyyət göstərən 30-a yaxın şirkətin nümayəndəsi iştirak edir.

Bundan başqa, Standartlaşdırma, Metrologiya və Patent üzrə Dövlət Komitəsində Keyfiyyəti idarəetmə sistemi üzrə Texniki Komitənin yaradılması barədə qərar qəbul edilib. Məqsəd bu sahədə mövcud olan İSO standartlarının Azərbaycanda tətbiqini sürətləndirməkdir. Texniki Komitənin işində ölkəmizdə bu sahədə fəaliyyəti razılaşdırılmış yerli və xarici şirkətlərin nümayəndələri iştirak edir. Hazırda fəaliyyət planı hazırlanan Keyfiyyəti idarəetmə sistemi üzrə Texniki Komitə Beynəlxalq Standartlaşdırma Təşkilatında (İSO) mövcud olan eyniadlı komitə ilə əlaqəli işləyəcək.

Eyni zamanda Standartlaşdırma, Metrologiya və Patent üzrə Dövlət Komitəsi Ekologiya və Təbii Sərvətlər Nazirliyi ilə birgə ekologiya sahəsi üzrə Texniki Komitənin yaradılması üçün işləri sürətləndirib. Artıq alt qurumun Əsasnaməsi və fəaliyyət planı müvafiq dövlət qurumunda müzakirəyə təqdim edilib. Texniki komitədə atmosferin, ətraf mühitin, torpaq və suyun çirklənmə səviyyəsini tənzimləyən standartlar hazırlanacaq.

Bununla yanaşı, Standartlaşdırma, Metrologiya və Patent üzrə Dövlət Komitəsi Fövqəladə Hallar Nazirliyi ilə birgə tikinti materialları üzrə Texniki Komitənin yaradılması ilə bağlı qərar qəbul edib. Hazırda Texniki komitənin Əsasnaməsi və 3 illik fəaliyyət planı üzərində müzakirələr aparılır. Məqsəd tikinti-inşaat sektorunda Avropa və İSO standartlarının tətbiqini sürətləndirməkdir. Texniki Komitənin işində müvafiq dövlət orqanları ilə yanaşı, Azərbaycanda fəaliyyət göstərən iri tikinti şirkətləri də iştirak edəcək.