Aqrar-sənaye kompleksi

Ana səhifə

Azərbaycan Kənd Təsərrüfatı Nazirliyi: Sel fəlakəti kənd təsərrüfatı məhsullarının qiymətinin artmasına səbəb olmayacaq

11 may 2010 12:52 (UTC +04:00)

Bunu «APA-Economics»ə açıqlamasında Azərbaycan Kənd Təsərrüfatı Nazirliyi mətbuat xidmətinin rəhbəri Murtuzəli Hacıyev bildirib.

Onun sözlərinə görə, sel fəlakəti ən çox pambıqçılıq sahəsinə təsir edib: «Belə ki, sel nəticəsində Mərkəzi Aran rayonlarında bu sahədə gecikmələr yaranacaq. Pambıqla yanaşı, taxılçılıq sahəsinə də ziyan dəyib. Lakin yağışlar nəticəsində bu il dəmyə əkinçiliyində yüksək məhsuldarlıq gözlənilir».

M.Hacıyevin sözlərinə görə, ümumilikdə hava şəraitindən asılı olaraq bu il ərzində ölkədə 2,7 mln. ton taxıl istehsalı gözlənilir: «Bir müddət əvvəl Mərkəzi Aran rayonlarında rütubətliyin həddindən artıq olması ilə əlaqədar taxılda sarıpas xəstəliyi yaranmışdı. Lakin nazirliyin mütəxəssislərinin səyi nəticəsində bu xəstəlik tədricən aradan qaldırılıb».

M.Hacıyev sel və yağıntılar nəticəsində tərəvəzçilik və meyvəçilik sahəsinə ciddi ziyan dəymədiyini də bəyan edib: «Tərəvəzçilik sahəsi üçün hələ ki gec deyil, əkinə başlamaq olar. O ki qaldı meyvəçilk sahəsinə, bu sahədə Quba, Xaçmaz rayonlarında siyirdəkli meyvələrə ziyan dəyib. Bunu da aqrar-texniki vasitələrin köməyi ilə aradan qaldırmaq mümkündür».

M.Hacıyev sel və daşqınlar nəticəsində bazarda kənd təsərrüfatı məhsullarının qiymətində artım olmadığını qeyd edib. «Kənd təsərrüfatı məhsullarının istehsalı aşağı düşməyib və hava şəraiti imkan verərsə, istehsalın aşağı düşməsi də gözlənilmir. Bu baxımdan bazarda kənd təsərrüfatı məhsullarının qiymətinin artımından söz gedə bilməz», - deyə nazirlik rəsmisi qeyd edib.