Aqrar-sənaye kompleksi

Ana səhifə

Bakıda “Quşçuluq təsərrüfatlarında və quşçuluq sənayesində biotəhlükəsizlik və onun tətbiqi” mövzusunda beynəlxalq seminar keçirilir

17 may 2010 08:51 (UTC +04:00)

Bakı. Rəşad Süleymanov - APA-Economics. Bu gün Bakıda BMT-nin Ərzaq və Kənd Təsərrüfatı Təşkilatının (FAO) təşkilatçılığı və Kənd Təsərrüfatı Nazirliyinin dəstəyi ilə Mərkəzi-Asiya Regional şəbəkəsi Proqramı çərçivəsində “Quşçuluq təsərrüfatlarında və quşçuluq sənayesində biotəhlükəsizlik və onun tətbiqi” mövzusunda treninq-seminar işə başlayıb.

«APA-Economics»in məlumatına görə, 3 gün davam edəcək beynəlxalq tədbirdə FAO, Azərbaycan, İran, Əfqanıstan, Pakistan, eləcə də Mərkəzi Asiya regionuna daxil olan ölkələrin milli əlaqələndiriciləri və quşçuluq təsərrüfatlarının nümayəndələri iştirak edirlər.

Seminarda dünyada yüksək patogenli quş qripinin (YPQQ) hazırkı vəziyyəti, quşçuluqda risk faktorları, biotəhlükəsizlik məfhumu ilə tanışlıq, Mərkəzi Asiyada biotəhlükəsizlik tədbirlərinin tətbiqi və digər məsələlər barədə müzakirələr aparılır. Tədbirin ikinci günü biotəhlükəsizlik üzrə kommunikasiyanın tətbiqi, ovçuların vəhşi və köçəri quşlarla təması, bütün növ ərzaq zəncirində biotəhlükəsziliyin təmin edilməsi üçün lazım olan tədbirlər, sənaye quşçuluğunda təmizlik və dezinfeksiya tədbirlərinin aparılması və digər mövzularda təqdimatlar olacaq. Təqdimatlardan sonra milli əlaqələndiricilər ölkələrində görülən işlər barədə məlumat verməklə mövzular ətrafında fikir mübadiləsi və diskussiyalar aparacaqlar. Tədbirin sonuncu günü biotəhlükəsizlik tədbirlərinin qarşısına çıxacaq maneələr, nəticələrin yekunların və veriləcək təkliflərdən söhbət açılacaq, treninq iştirakçılarına sertifikatlar veriləcək.

Tədbirdə çıxış edən Azərbaycan kənd təsərrüfatı nazirinin müavini Bəhrəm Əliyev Azərbaycanın quşçuluq təsərrüfatlarında təhlükəsizlik tədbirlərindən danışıb. Nazir müavini qeyd edib ki, hazırda Azərbaycanda «quş qripi» xəstəliyi yoxdur: «Bu gün Azərbaycanda başqa xəstəliklər olsa da, bu xəstəlik yoxdur. Amma başlanğıcda olub. Bu gün dünyadakı qabaqcıl laboratoriyalar Azərbaycanda qurulub, bu laboratoriyalar vasitəsi ilə nəinki quş qripi, eləcə də digər xəstəlikləri təyin etmək mümkündür».

Nazir müavini belə bir təhlükəli virusun olmamasına baxmayaraq, mütəmadi olaraq Dövlət Baytarlıq Xidməti tərəfindən monitorinqlərin aparıldığını, problemlərin öyrənildiyini qeyd edib.