Aqrar-sənaye kompleksi

İlin əvvəlindən Azərbaycanda ət istehsalı 1,5% azalıb

17 may 2010 11:38 (UTC +04:00)

Bakı. Nicat Mustafayev – APA-Economics. Bu ilin may ayının 1-dək Azərbaycanda 232,2 min hektar sahədə yazlıq bitkilər əkilib.

Dövlət Statistika Komitəsindən «APA-Economics»ə verilən məlumata görə, hesabat dövründə o cümlədən 20,5 min hektar sahədə dənli və dənli paxlalı bitkilər (qarğıdalısız), 13,9 min hektar sahədə dən üçün qarğıdalı, 51,5 min hektar sahədə kartof, 49,3 min hektar sahədə tərəvəz, 9,6 min hektar sahədə pambiq çiyidi, 17,8 min hektar sahədə bostan bitkiləri, 7 min hektar sahədə şəkər çuğunduru, 5,1 min hektar sahədə dən üçün günəbaxan və 531 hektar sahədə tütün əkilib.

Sahənin heyvandarlıq bölməsində ilin əvvəlindən keçən vaxt ərzində diri çəkidə ət istehsalı 1,5% azalaraq 95,4 min tona, süd istehsalı 4,1% artaraq 460,7 min tona, yumurta istehsalı 1% artaraq 399,6 mln. ədədə çatıb.

Bitkiçilik məhsullarından 27,3 min ton və ya 17% çox tərəvəz, həmçinin 220 ton kartof istehsal edilib.

Kənd əməkçilərinin səyi nəticəsində 2009-cu ilin müvafiq dövrü ilə müqayisədə bitkiçilik məhsulları istehsalı 11,2%, heyvandarlıq məhsulları istehsalı 1%, kənd təsərrüfatının ümumi məhsulu isə 1,4% artıb.