Aqrar-sənaye kompleksi

Ana səhifə

«Azərbaycandan kənd təsərrüfatı və qida məhsullarının ixracında sertifikatlaşdırma» mövzusunda seminar keçirilib

10 iyun 2010 11:48 (UTC +04:00)

Bakı. Nicat Mustafayev – APA-Economics. Bu gün Gəncədə Azərbaycan İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (Azpromo) təşkilatçılığı ilə Avropa İttifaqının TACIS Proqramının «Azərbaycanda ixrac və investisiya mühitinin yaxşılaşdırılması Layihəsi» çərçivəsində «Azərbaycandan kənd təsərrüfatı və qida məhsullarının ixracında sertifikatlaşdırma» mövzusunda seminar keçirilib.

Nazirlikdən «APA-Economics»ə verilən məlumata görə, tədbirin keçirilməsində məqsəd ixracyönlü və rəqabətqabiliyyətli məhsulların istehsalı sahəsində sahibkarlıq subyektlərinin informasiya təminatını gücləndirmək, onları bu sahədə mövcud qanunvericiliyin tələbləri barədə məlumatlandırmaqdan ibarət olub.

Seminarda müvafiq dövlət qurumlarının nümayəndələri ilə yanaşı Gəncə və ətraf rayonlarda kənd təsərrüfatı və qida sənayesi sahəsində fəaliyyət göstərən 30-a yaxın iş adamı da iştirak edib.

Tədbirdə TACIS Proqramı, Gəncə şəhər İcra Hakimiyyəti, İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti, Kənd Təsərrüfatı Nazirliyi və Azpromo-nun nümayəndələri çıxış edərək ixrac olunan məhsullar üçün verilən sertifikat və lisenziyalar (icazələr) haqında, məlumat verib, qida və kənd təsərrüfatı məhsullarının ixracında sertifikatlaşdırmanın əhəmiyyətini vurğulayıblar.

Qeyd edək ki, bu cür tədbirlərin ölkənin digər regionlarında da keçirilməsi nəzərdə tutulur.