Aqrar-sənaye kompleksi

Azərbaycanda kənd təsərrüfatı məhsullarının istehsalı artıb

18 iyun 2010 07:27 (UTC +04:00)

Dövlət Statistika Komitəsindən «APA-Economics»ə verilən məlumata görə, yazlıq kənd təsərrüfatı bitkilərinin kütləvi əkini əsasən başa çatıb və iyunun 1-i vəziyyətinə 352,5 min hektar sahədə yazlıq bitkilər əkilib.

Əkin yerinin strukturunda baş vermiş dəyişikliyə görə keçən ilə nisbətən çəltiyin əkin sahəsi 35,5%, dən üçün günəbaxanın əkin sahəsi 18,4%, pambığın əkin sahəsi 47,4%, tütünün əkin sahəsi 28,6%, şəkər çuğundurunun əkin sahəsi 11,6%, tərəvəzin əkin sahəsi 5%, ərzaq üçün bostan bitkilərinin əkin sahəsi 12,8% və çoxillik otların əkin sahəsi 9,4% artıb.

Hesabat dövründə həmçinin 1,8 min hektar sahənin taxılı biçilib və hər hektardan 22,3 sentner olmaqla 4 min ton taxıl məhsulu götürülüb. Keçən il bu tarixə 8,6 min hektar sahədən 17,9 min ton taxıl məhsulu götürülüb.

Bununla yanaşı, sahələrdən 47,5 min ton kartof, 60,5 min ton tərəvəz 4,4 min ton meyvə və giləmeyvə məhsulları, habelə 247 ton yaşıl çay yarpağı yığılıb. Yaşıl çay yarpağı istehsalı istisna olmaqla qalan məhsulların istehsal həcmi keçən ilə nisbətən aşağı düşüb. Təsərrüfatlarda mineral gübrələrinin istifadə edilməsinin getdikcə artması bitkilərin məhsuldarlığına öz müsbət təsirini göstərib. Belə ki, mövsüm ərzində taxılın hər hektardan orta məhsuldarlığı 22,3 sentner, tərəvəzin məhsuldarlığı 97,1 sentner olmaqla keçən ilin müvafiq dövrünə nisbətən onların miqdarı, uyğun olaraq 1,4 və 3,5 sentner artıb.

Cari ilin yanvar-may aylarında ölkədə diri çəkidə 120,1 min ton mal-qara və quş əti, 601,9 min ton süd, 508,6 mln. ədəd yumurta və 10,7 min ton yun istehsal edilib. Ötən ilin yanvar-may aylarına nisbətən mal-qara və quş əti istehsalı 0,1%, süd istehsalı 4,6%, yumurta istehsalı 0,7% və yun istehsalı 1,5% artıb.

Hesabat dövründə kənd təsərrüfatının ümumi məhsulunun faktiki qiymətlərlə dəyəri 670,7 mln. manat təşkil edib. Keçən ilin eyni dövrünə nisbətən onun sabit qiymətlərlə dəyəri ümumi məhsul üzrə 0,4%, o cümlədən heyvandarlıq məhsulları üzrə 2% artıb, bitkiçilik məhsulları üzrə isə 11,3% azalıb.

Cari ilin ötən beş ayı ərzində ölkənin meşəçilik təsərrüfatlarında istehsal edilmiş məhsul və xidmətlərin faktiki qiymətlərlə dəyəri 556,2 min manat olub. Balıqçılıqla məşğul olan təsərrüfatlar tərəfindən isə 58,4 min manat dəyərində balıq ovlanıb.