Aqrar-sənaye kompleksi

IFAD prezidenti Azərbaycana gəlib

22 iyun 2010 10:59 (UTC +04:00)

«APA-Economics»in məlumatına görə, IFAD rəhbəri Bakıda iyunun 23-24-də keçiriləcək İslam İnkişaf Bankı Müdirlər Şurasının 35-ci İllik Toplantısında iştirak edəcək. Həmçinin, bu tədbirdə «Böhrandan sonrakı dünyada üzv ölkələrdə ərzaq təhlükəsizliyinə nail olmaq» mövzusunda çıxış edəcək.

K.Nvanze bu gün Azərbaycan Kənd Təsərrüfatı Nazirliyində nazir İsmət Abasov tərəfindən qəbul edilib. Görüş zamanı İ.Abasov bildirib ki, Azərbaycan IFAD-la sıx əməkdaşlıq edir və bu günədək bir sıra birgə layihələr reallaşdırılıb: «Bu layhələr kənd yerlərində əhalinin rifahının yüksəlməsinə öz təsirini göstərib və bu davam etməkdədir».

K.Nvanze isə IFAD-ın Azərbaycanı digər ölkələrə nümunə göstərdiklərini vurğulayıb. IFAD-ın Azərbaycanla tərəfdaşlığının bundan sonra da gücləndirilməsi yollarının araşdırıldığını deyən təşkilat rəhbəri başçılıq etdiyi qurumun bu günədək Azərbaycanda ümumi məbləği 48,1 mln. dollar olan dörd layihə və proqrama dəstək olduğunu bildirib. Bu layihə və proqramlardan 40 minə yaxın ailə bəhrələnib. Təşkilat rəhbəri İslam İnkişaf Bankı ilə birgə maliyyələşdiriləcək və kənd yerlərinin inkişafı ilə bağlı ümumi dəyəri 100 mln. ABŞ dolları olan digər layihənin isə hazırlıq mərhələsində olduğunu qeyd edib.

İ.Abasov jurnalistlərə açıqlamasında bildirib ki, Azərbaycan hökuməti, İslam İnkişaf Bankı və IFAD tərəfindən birgə həyata keçiriləcək «Kənd inkişafı layihəsi» Ağdaş, Yevlax, Oğuz və Şəki rayonlarını əhatə edəcək. Bu layihənin həyata keçirilməsi aqrar sektorun inkişafına təkan verəcək.

Azərbaycanla 10 ildən artıq əməkdaşlıq etdiklərini deyən K.Nvanze də əməkdaşlığı yüksək qiymətləndirdiklərini vurğulayıb: «Biz Azərbaycanla keçirilən layihələrdən razıyıq. İstərdik ki, digər ölkələrin də IFAD-la qurduğu əməkdaşlıq bu səviyyədə olsun».

Təşkilat rəhbəri bildirib ki, hazırda Azərbaycanın ümumi daxili məhsul istehsalında kənd təsərrüfatının rolu böyük olmasa da, bu sahə prioritet sahə elan olunub və dövlətin bu sahəyə böyük dəstəyi mövcuddur.

Qeyd edək ki, Bakıya səfəri çərçivəsində İFAD başçısının Azərbaycan prezidenti İlham Əliyev və baş nazir Artur Rasizədə tərəfindən də qəbul olunacağı gözlənilir.