Aqrar-sənaye kompleksi

«Azərbaycan Dəmir Yolları» QSC-nin daha bir işçi qatarı Bakı-Qars layihəsi ilə bağlı Gürcüstana yola düşüb

22 iyun 2010 13:36 (UTC +04:00)

Bakı. Rəşad Süleymanov – APA-Economics. Bakı-Tiflis-Qars (BTQ) dəmir yolu bağlantısının tikintisində iştirak etmək üçün «Azərbaycan Dəmir Yolları» QSC-nin «Dəmiryolsçervis» MMC-nin işçi qatarı Gürcüstana yola düşüb. Bu barədə «APA-Economics»ə səhmdar cəmiyyətinin mətbuat xidmətinin rəhbəri Nadir Əzməmmədov məlumat verib.

Gürcüstana göndərilən işçi qatar 63 vaqondan ibarətdir. Qatarın tərkibində təmir-bərpa briqadalarının müvəqqəti məskunlaşması üçün 2 sərnişin vaqonu, su çəni olan bir platforma, yol döşəyən kranlar, KDE-163 markalı dəmir yolu kranları, MPD-1055 markalı motorlu platforma, avtokran, ekskovator, özül qazan və ağac şpallar və bağlayıcılar yüklənmiş vaqonlar var. Qatar Marabda, oradan da Çxardzma stansiyasına gedəcək.

Xatırladaq ki, BTQ bağlantısının Gürcüstan hissəsinin tikintisini «Azərinşaatservis» şirkəti həyata keçirir və «Dəmiryolsçervis» MMC podratçı təşkilat kimi layihədə iştirak edir.

BTQ-nin tikintisində iştirak etmək üçün «Azərbaycan Dəmir Yolları» QSC-nin ilk işçi qatarı mayın 5-də Gürcüstana gedib.

Qeyd edək ki, BTQ-nin tikintisi ilə bağlı Azərbaycan, Gürcüstan və Türkiyə arasında yekun sənəd 2007-ci il fevralın 8-də Tiflisdə imzalanıb. Yeni dəmir yolunun tikinti işlərinə 2007-ci il noyabrın 21-də start verilib. Azərbaycan yolun Gürcüstan ərazisinə düşən hissəsinin tikintisi üçün bu ölkənin «Marabda-Kartsaxi Dəmir Yolları» MMC-yə güzəştli şərtlərlə (illik 1%-lə 25 illiyə) 200 mln. ABŞ dolları məbləğində kredit ayırıb. Bu vəsait hesabına Gürcüstan ərazisində 29 km uzunluğunda yeni yol, Türkiyə ilə sərhəddə təkər dəyişmə məntəqəsi tikiləcək, həmçinin köhnə yol rekonstruksiya olunacaq. Layihənin ümumi dəyəri isə 600 mln. dollardan artıqdır. Dəmir yolunun Gürcüstan hissəsinin tikintisini Azərbaycanın «Azərinşaatservis» şirkəti həyata keçirir.

Dəmir yolunun 2011-ci ilin ortalarına qədər istifadəyə verilməsi planlaşdırılır. Türkiyə ərazisində isə Gürcüstanla sərhəddən Qarsa qədər uzunluğu 76 km olan yeni dəmir yolu xətti tikiləcək.