Aqrar-sənaye kompleksi

Borçalının taxıl zəmilərində ermənilər günəbaxan əkir - ARAŞDIRMA

Borçalının taxıl zəmilərində ermənilər günəbaxan əkir - <font color=red>ARAŞDIRMA</font>

22 iyun 2010 13:46 (UTC +04:00)

Marneuli. Nizami Məmmədzadə - APA. Son illər Gürcüstanda, xüsusən soydaşlarımızın kompakt yaşadığı Marneuli, Bolnisi və Qardabani rayonlarında soydaşlarımız özəlləşdirdikləri əkin sahələrində taxıl əkməyi xeyli azaldıblar. APA-nın Gürcüstan bürosunun məlumatına görə, soydaşlarımız əldə etdikləri hazır məhsulu heç bir yerə təhvil verə və yaxud bazarda sata bilmirlər.

Sakinlər bunun müxtəlif səbəbləri olduğunu bildirirlər: “Ən başlıcası keyfiyyətli toxum yoxdur. Fermerlər hardansa toxum tapanda isə onun yüksək kleykovinası (yapışqanlığı) olmur, onu un dəyirmanlarına təhvil vermək çətin olur, nəticədə məhsul anbarlarda gəmiricilərə qismət olur”.

Bolnisidən olan fermer Rza Qurbanov APA-ya bildirib ki, Gürcüstanda avqust müharibəsindən sonra Rusiyaya çıxış bağlandığına görə soydaşlarımız becərdikləri kartof məhsulunu Rusiya bazarlarında sata bilmirlər: “Məhsulumu Rusiyaya aparmaq istədim, yollar bağlı olduğuna görə imkan olmadı. Sonra Azərbaycan və Gürcüstan gömrük məntəqələrinə, o cümlədən əlaqədar təşkilatlara müraciət etdik. Lakin faydası olmadı. Məmurların özbaşınalığı bütün yollarımızı burda da bağladı. Nəticədə 6 min ton kartof məhv oldu”.

Azərbaycanlıların kompakt yaşadığı kəndlərdə kənd təsərrüfatı bitkiləri becərməklə məşğul olan fermerlər APA-nın Gürcüstan bürosuna bildiriblər ki, göstərilən səbəblərdən soydaşlarımız bəzi ərzaq bitkilərinin becərilməsini təşkil edə bilmirlər: “Torpağa çəkilən xərci götürmək mümkün olmur. Məhz bu səbəbdən son illər yerli erməni fermerlər və fiziki şəxslər soydaşlarımızın özəlləşdirdiyi torpaqları icarəyə götürüb günəbaxan əkir və günəbaxan yağı istehsal etmək üçün hər kiloqramını bir dollardan da yuxarı qiymətə Ermənistana təhvil verirlər”.

Marneuli rayon İcra Hakimiyyətindən bildiriblər ki, bu yaxınlarda Gürcüstanın Kənd Təsərrüfatı Nazirliyi Marneulidə fermerlərlə keçirilən iclasda onlara taxıl əkmək üçün toxum təklif edib. Nazirlik verilən toxumun dəyərini məhsul biçinindən sonra ödəmək şərti ilə onlara müraciət edən fermerlərə veriləcəyini vurğulayıb.

Bir neçə gün əvvəl isə Avropa İttifaqının komissiyası Gürcüstanda kənd təsərrüfatı sahəsini öyrənmək üçün araşdırma aparıb. Komissiya üzvləri belə qənaətə gəliblər ki, ölkədə yoxsulluğun hələ də olmasının əsas səbəbi kənd təsərrüfatının zəif inkişaf etməsidir. “Gürcüstanda əsas məhsul istehsalı 10% təşkil edir və bu əsas sektorla əhalinin yarıdan çoxu məşğul olur. Gürcüstan Özbəkistan və Tacikistandan 14%, Ermənistandan 11% geridə qalır. Deməli, iş effektli getmir” - deyə Avropa İttifaqının nümayəndəsi Xuan Esanove vurğulayıb.

Gürcüstan Kənd Təsərrüfatı Nazirliyi isə buna münasibət bildirməyib: “Bizim bu araşdırmadan xəbərimiz yoxdur”.