Aqrar-sənaye kompleksi

Xəzəryanı ölkələr üzrə 2010-cu il üçün balıq ovu kvotası müəyyənləşdirilib

25 iyun 2010 07:30 (UTC +04:00)

Azərbaycan Ekologiya və Təbii Sərvətlər Nazirliyinin Su Hövzələrində Bioloji Resursların Artırılması və Mühafizəsi Departamentindən APA-ya verilən məlumata görə, iclasda Azərbaycanı Departamentin mütəxəssislərindən ibarət nümayəndə heyəti təmsil edib.

Toplantıda 6 məsələ gündəliyə salınıb və müzakirə olunub. Bunlardan birincisi Xəzərətrafı ölkələrin 2010-cu il üçün nəzərdə tutulmuş balıq ovu kvotasının mənimsənilməsi, su bioresurslarının artırılması və mühafizəsi haqqında hesabatın dinlənilməsi və qəbulu ilə bağlı olub.

İkinci məsələdə tərəflərin balıq ehtiyatlarının öyrənilməsi üzrə 2010-cu ildə aparılmış elmi tədqiqat işləri barədə hesabat dinlənilib və qəbul olunub.

Üçüncü məsələdə 2010-cu il üçün balıq ovunun ümumi həddi və onun milli kvotalara bölünməsi məsələləri müzakirə edilib və 2008-ci ilə nisbətən (2009-cu ildə balıq ovu kvotası qəbul edilməyib) kvotanın ümumi həddi 7% aşağı salınmaqla, Azərbaycan üzrə 6,7% qəbul edilib.

İclasda Azərbaycan nümayəndə heyəti bölgə balığının sənaye ovundan birtərəfli imtina etdiyi və onun ehtiyatlarından yalnız balıqartırma və elmi tədqiqat məqsədləri üçün istifadə edəcəyi barədə xüsusi bəyanatla çıxış edərək digər ölkələri də bu təklifə qoşulmağa çağırıb.

Dördüncü məsələdə Qazaxıstanın Xəzərdə nərəcinsli balıqların ovuna ümumi qadağa (moratoriya) qoyulması təklifi müzakirə edilib. İran və Türkmənistan bu məsələnin ətraflı öyrənilməsini və hüquqi mexanizminin işlənilməsindən sonra baxılmasını təklif edib, Rusiya isə balıqartırma və elmi məqsədlər üçün istifadə şərtilə ovu saxlamağa razılığını bildirib.

Qeyd edək ki, CITES Konvensiyasının Tərəflərinin 14-cü konfransında 12.7 qətnaməsinə edilən dəyişiklik və əlavələrə əsasən hər hansı ölkə birtərəfli qaydada balıq ovuna qadağa qoya bilər. Azərbaycan tərəfi çıxışında bu qətnamədən istifadə edərək 4 növ nərə balığından ikisinin (kələmo (şip) balığına 1979-cu ildə, bölgə balığına isə 2009-cu ildə) ovuna birtərəfli qaydada qadağa qoyduğunu bəyan edib. Qazaxıstana isə Azərbaycan tərəfinin nümunəsindən istifadə edərək, ehtiyatları kəskin azalan növlərin ovundan birtərəfli qaydada imtina etməyi və ya ümumi ovun azalması təklifinə baxmağı təklif edib.

Beşinci məsələdə BMT-nin Ərzaq Təşkilatının (FAO) Xəzərdə balıqçılıq təsərrüfatının idarə edilməsi üzrə apardığı layihənin müddətinin uzadılması barədə İranın təklifi müzakirə edilərək qəbul olunub. Bu məqsədlə azı 3 Xəzərətrafı dövlətin kənd təsərrüfatı nazirlərinin FAO təşkilatına müraciətinin vacibliyi bildirilib.

Sonuncu məsələdə müxtəlif cari məsələlər müzakirə olunub.

İclasda Azərbaycan nümayəndə heyətinin təklifi ilə 2011-ci il üçün balıq ovu kvotasının qəbul edilməsinə həsr olunmuş növbəti 32-ci iclasın dekabr ayının 1-ci ongünlüyündən gec olmayaraq İranda keçirilməsi qəbul edilib.