Aqrar-sənaye kompleksi

Dmanisidə tikiləcək süd məhsulları zavodunun layihəsinin təqdimatı keçirilib - FOTO

Dmanisidə tikiləcək süd məhsulları zavodunun layihəsinin təqdimatı keçirilib - <font color=red>FOTO</font>

02 iyul 2010 16:11 (UTC +04:00)

Dmanisi. Nizami Məmmədzadə-APA. Bu gün Dmanisidə alman mütəxəssislərinin iştirakı ilə rayonda tikiləcək yağ-pendir zavodunun layihəsinin təqdimatı olub. APA-nın Gürcüstan bürosunun məlumatına görə, “ Dmanisinin ən gözəl məhsulları” adlı layihənin təqdimat mərasimini alman mütəxəssis İohanes Hansler açaraq layihə barədə tədbir iştirakçılarına məlumat verib. Jurnalistlərə açıqlama verən mütəxəssis bildirib ki, layihənin əsas təşəbbüskarı Azərbaycandır. “ Biz belə bir layihəni artıq Ağstafada gerçəkləşdirmişik. Eyni oxşar layihənin təqdimatı bu gün burada keçirilir. Bizim üçün çox fərəhlidir ki, Azərbaycanın nail olduğu bu yeniliklər Gürcüstanda da tətbiq edilir. Bu layihə 1926-cı ildə Dmanisidə almanlar tərəfindən tikilən pendir-süd zavodunun bərpası ilə əlaqədardır. Bizdə olan məlumata görə, bu zavodda 1945-1946-cı illərə qədər pendir və süd məhsulları istehsal olunub. Binanın vəziyyəti hələ də yaxşı qalıb.”

Layihə müəllifi Dmanisi regionunda 22 min sağmal inək olduğunu deyib. “ 7 milyon dəyərində olan bu layihə sayəsində biz fermerlərdə maraq oyadacağıq və yüzdən artıq iş yeri açılacaq. Çalışacağıq ki, buraxdığımız məhsul keyfiyyətli olsun və Gürcüstan bazarında satılsın. Layihəni hazırlayanda biz Gürcüstan bazarını dəyərləndirdik ə gördük ki, buradakı mallar Avropadan gətirilir. Burada istehsal olunan məhsullar bioloji cəhətdən Avropada istehsal olunan məhsullarından keyfiyyətli olacaq və biz getdikcə Avropa məhsullarını Gürüstanda istehsal olunan məhsullarla əvəz edəcəyik”.

Azərbaycanın Gürcüstandakı səfiri Namiq Əliyev APA-nın Gürcüstan bürosuna verdiyi açıqlamada layihənin kifayət qədər maraqlı olduğunu deyib: “Burada istehsal olunan məhsul ekoloji cəhətdən təmiz ərzaq olacaq. Bu müəssisə təkcə Dmanisini deyil, eyni zamanda Gürcüstanın digər ərazilərini də pendir və süd məhsulları ilə təmin edəcək. Müəssisə ilk mərhələdə 20 min litr süd qəbul edəcək, ikinci mərhələdə bu rəqəm 60 minə qaldırılacaq, üçüncü mərhələdə isə 120 min litr olacaq. Burada gündə ən azı 2 min ton pendir hazırlanacaq. Bu kifayət qədər böyük rəqəmdir. Bu müəssisənin işə düşməsi Dmanisidə işsizliyin ləğvinə kömək göstərəcək. Burada yaşayan soydaşlarımız iş ilə təmin olunacaq”.