Aqrar-sənaye kompleksi

Ana səhifə

Nazir: Bu il Azərbaycanda 680 min ton meyvə istehsalı gözlənilir

14 iyul 2010 12:30 (UTC +04:00)

Bakı. Nicat Mustafayev – APA-Economics. Bu il Azərbaycanda 99 min hektar bar verən meyvə-giləmeyvə bağlarından 680 min ton məhsul alınması gözlənilir.

«APA-Economics»in məlumatına görə, bunu Azərbaycan Prezidenti İlham Əliyevin sədrliyi ilə keçirilən Nazirlər Kabinetinin 2010-cu ilin birinci yarısının sosial-iqtisadi inkişafının yekunlarına həsr olunmuş iclasında ölkənin kənd təsərrüfatı naziri İsmət Abasov bildirib.

Nazirin sözlərinə görə, 2010-cu ildə 375,7 min hektar sahədə yazlıq bitkilər əkilib ki, bu da keçən ildəkindən 18,6 min hektar və ya 5,2% çoxdur: «O cümlədən təxminən keçənilki səviyyədə - 66 min hektar sahədə kartof, 32,5 min hektar və ya keçən ildəkindən 1,3 min hektar çox bostan və 81,1 min hektar sahədə və ya keçən ildəkindən 1,2 min hektar çox tərəvəz bitkiləri əkilib. Yaşıl çay plantasiyalarında əvvəlki illərə nisbətən qulluq işləri yaxşılaşdırılmış və 450 ton yaşıl çay yarpağı istehsalı gözlənilir».

Hevandarlıq sahəsinə gəldikdə, İ.Abasov bildirib ki, heyvandarlığın yem bazasını möhkəmləndirmək məqsədilə 78,2 min hektar sahədə çoxillik otlar əkilib ki, bu da keçən ildəkindən 6,5 min hektar və ya 9,1% çoxdur.

Nazirin sözlərinə görə, Cənubi Qafqaz regionunda ilk dəfə olaraq Azərbaycanda süni mayalanma mərkəzi fəaliyyət göstərir və indiyədək 500 nəfər süni mayalanma texniki hazırlanıb və onlar lazımi avadanlıqla təmin olunub: «Keçən il süni mayalanma yolu ilə 23 min baş, cari ilin 6 ayında isə 17 min sağlam bala alınıb. Bu üsulla alınmış inəklərin hər birindən orta hesabla 3-3,5 min kq süd sağılır».