Aqrar-sənaye kompleksi

Ana səhifə

Azərbaycan Türkmənistana pivə ixrac edəcək

09 avqust 2010 13:33 (UTC +04:00)

«APA-Economics»in məlumatına görə, bunu «Baltika-Bakı» şirkətinin baş direktoru Adam Tlexuray bildirib.
Onun sözlərinə görə, bu ilin payız aylarından etibarən «Baltika-Bakı» şirkəti Türkmənistana pivə ixrac etməyə başlayacaq: «Hazırda biz yalnız Gürcüstana pivə ixrac edirik və cari ilin I rübündə «Baltika-Bakı» şirkəti tərəfindən bu ölkəyə 4 min dekalitr pivə ixrac olunub. Lakin buna baxmayaraq, digər qonşu ölkələrinin də tələbatını və bazarını təhlil edib öyrənirik».
A.Tlexuray onu da qeyd edib ki, Xırdalanda yerləşən «Baltika-Bakı» pivə zavodunun ümumi gücünün hazırda 30%-i istifadə olunur. Beləki, əgər zavodun illik gücü 10 mln. dekalitr təşkil edirsə, müəssisədə faktiki olaraq təxminən 3 mln. dekalitr pivə istehsal olunur: «Hazırda zavodda «Əfsanə», «Bizim Pivə», «33 Export», «Xırdalan», «Baltika №3, № 5, № 7, № 9», «Baltika Kuler», «Arsenalnoye» və bu kimi pivə brendləri istehsal olunur. Lakin biz daim daxili bazarın tələbatını öyrənirik və əgər tələbat olarsa biz Belçikada olduğu kimi meyvəli pivə də istehsal etməyə hazırıq».
Qeyd edək ki, Rusiyanın pivə bazarında 1996-cı ildən liderlik edən «Baltika» şirkətinin Rusiyada 10, Azərbaycanda isə 1 pivə bişirmə zavodu fəaliyyət göstərir. Şirkətin məhsulları 60 ölkəyə ixrac olunur. «Baltika» ASC 2008-ci ilin avqust ayında «Bakı-Castel» pivə zavodunun 92% səhmini alıb və 2009-cu il ərzində bu müəssisəyə 20 mln. ABŞ dolları məbləğində vəsait yatırıb. Alqı-satqı müqaviləsi imzalandıqdan sonra müəssisənin brendi «Balktika-Bakı»ya dəyişdirilib. Hazırda müəssisə ölkənin pivə bazarının 70%-ni əhatə edir.