Aqrar-sənaye kompleksi

Kənd Təsərrüfatı Nazirliyi: Rusiyanın taxıl ixracına qadağa qoymasının Azərbaycan bazarına təsiri olmayacaq

16 avqust 2010 11:19 (UTC +04:00)

Bu barədə APA-ya açıqlamasında Azərbaycan Kənd Təsərrüfatı Nazirliyinin mətbuat xidmətinin rəhbəri Murtuzəli Hacıyev bildirib.

M.Hacıyevin sözlərinə görə, nazirliyin apardığı araşdırmalara görə, bu il Azərbaycanda taxıl istehsalının azalmasına baxmayaraq, ölkədə yığılan buğda və idxal mövcud tələbatı tam ödəyəcək.

«Azərbaycanda buğdaya illik tələbat 1,56 mln. tondur. Son 5 ayda ölkəyə 520 min tondan artıq buğda idxal olunub. Rusiya idxalda 13% paya malikdir və idxalda əsas yeri Qazaxıstan tutur. Qazaxıstan tərəfi isə bildirib ki, bu il kifayət qədər istehsal var və lazım olan həcmdə Azərbaycana ixrac həyata keçirə bilər. Ümumilikdə, ilin sonuna Azərbaycanda 900 min ton buğda ehtiyatı olacaq», - deyə M.Hacıyev vurğulayıb.

M.Hacıyev bildirib ki, Kənd Təsərrüfatı Nazirliyi ölkədə çörəyin qiymətinin artımı üçün heç bir əsas görmür və haradasa baş verən hadisələrin süni şəkildə yaradıldığını düşünür. Nazirlik hesab edir ki, müvafiq strukturlar bununla bağlı araşdırmalar aparıb tədbirlər görəcək.

Nazirlik rəsmisi onu da qeyd edib ki, ötən il istehsal edilən buğdanı münasib qiymətə sata bilməyən fermerlər artıq 1 kq buğdanı 25-30 qəpiyə satır. Bu da fermerlərə məhsulun maya dəyərini çıxarmağa və gəlir əldə etməyə imkan yaradır.

İqstiadi İnkişaf Nazirliyindən isə «APA-Economics»ə bildirilib ki, hazırda Nazirlik yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti tərəfindən Bakı və ölkənin regionlarında çörək bazarında aparılan monitorinq davam etdirilir və yaxın gələcəkdə yoxlamaların nəticələri açıqlanacaq. Nazirlikdən həmçinin bildirilib ki, çörəyin qiymətinin artırılmasını qeydə alan istehlakçılar (+994 12) 498 15 01/04 və ya 195-2 telefon nömrələrinə zəng edərək qeydə alınmış faktlar haqqında məlumat verə bilərlər.

Qeyd edək ki, Dövlət Gömrük Komitəsinin ötən həftə açıqladığı məlumata görə, cari ilin yanvar-iyul ayları ərzində Azərbaycana 647 146,7 ton buğda və 2 418,1 ton un idxal olunub. Ötən ilin müvafiq dövrü ilə müqayisədə buğda idxalı 4% artıb, un idxalı isə 12 dəfə azalıb.

Kənd Təsərrüfatı Nazirliyinin açıqladığı məlumatlara görə, cari il avqust ayının 10-u tarixinə Azərbaycanda 1,305 mln. ton ərzaq buğdası istehsal olunub.