Aqrar-sənaye kompleksi

Ana səhifə

Avropa Komissiyası Azərbaycanın Tvininq layihəsini ən uğurlu layihə elan edib

24 avqust 2010 14:21 (UTC +04:00)

Bakı. Nicat Mustafayev - APA-Economics. «Azərbaycanın ərzaq keyfiyyəti və təhlükəsizliyinin təminatı və Azərbaycan mənşəli balıq məhsullarının sertifikatlaşdırılmasının hüquqi və texniki təkmilləşdirilməsinə dəstək» Tvininq layihəsi 2004-2010-cu illər ərzində Avropa Komissiyasının dəstəyi ilə Avropa Qonşuluq Siyasəti Fəaliyyət Planı çərçivəsində həyata keçirilmiş 225 Tvininq layihəsi arasında ən uğurlu 4 layihədən biri seçilib.

Azərbaycan İqtisadi İnkişaf Nazirliyindən «APA-Economics»ə verilən məlumata görə, bu barədə məlumat Avropa Komissiyasının Tvininq, TAİEX və Sigma layihələri ilə bağlı 2009-cu ilin yekunlarına dair bu yaxınlarda açıqladığı hesabatında öz əksini tapıb.

2008-ci il oktyabrın 1-dən etibarən İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidmətində Avropa Komissiyasının dəstəyi, Hollandiya Krallığının Ərzaq və İstehlak Mallarının Təhlükəsizliyi üzrə Səlahiyyətli Orqanı və Latviyanın Ərzaq və Baytarlıq Xidməti tərəfindən «Azərbaycanın ərzaq keyfiyyəti və təhlükəsizliyinin təminatı və Azərbaycan mənşəli balıq məhsullarının sertifikatlaşdırılmasının hüquqi və texniki təkmilləşdirilməsinə dəstək» Tvininq layihəsi həyata keçirilir.

Layihənin reallaşdırılmasında məqsəd Azərbaycan mənşəli balıq məhsullarının Avropa İttifaqına ixracını təmin etmək üçün Dövlət Xidmətinin müvafiq sahədə çalışan əməkdaşlarının peşəkarlığının artırılması, bu sahəni tənzimləyən qanunvericilik bazasının Avropa İttifaqının qanunvericiliyinə uyğunlaşdırılması, Dövlət Xidmətinin laboratoriyalarının imkanlarının genişləndirilməsi və fəaliyyətinin beynəlxalq tələblərə uyğun qurulmasıdır.

Layihənin icrası ilə əlaqədar artıq bir sıra işlər görülüb. Belə ki, 2010-cu ilin 1 yanvar tarixindən etibarən Avropa Komissiyasının qərarı ilə Azərbaycan balıq kürüsünün Avropa İttifaqına idxalına icazə verilən üçüncü ölkələr siyahısına daxil edilib. Hazırda digər növ balıq məhsullarının Avropa İttifaqına ixracı üçün icazənin alınması istiqamətində işlər davam etdirilir.