Aqrar-sənaye kompleksi

Rusiyada kartof da bahalaşır

06 sentyabr 2010 07:45 (UTC +04:00)

Bakı. Nicat Mustafayev - APA-Economics. Qarabaşağın ardınca Rusiyada son həftə ərzində kartofun da qiyməti artıb.

«APA-Economics»in Rusiya mətbuatına istinadən xəbərinə görə, hazırda Rusiyada kartofun yığımının ən qızğın vaxtıdır və bu vaxtlar ölkə bazarında məhsul kifayət qədər ucuz satılır. Lakin son bir həftə ərzində kartof 0,4% bahalaşıb. Halbuki son 20 il ərzində avqust ayı ərzində kartof hər il 10-15% ucuzlaşır. Bu il ərzində isə kartof Rusiyada cəmi 0,6% ucuzlaşandan sonra 0,4% bahalaşıb.

Hazırda Rusiyanın regionlarında kartofun topdan satış qiyməti 13-16 rubl (0,4-0,5 dollar) təşkil edir. Ötən ilin analoji vaxtında isə kartofun qiyməti 6-7 rubl (0,2 dollar) olub. Bununla yanaşı, ölkə fermerləri kartofun bir qədər bahalaşacağını bildirib.

Kartofun bu cür topdansatış qiyməti pərakəndə bazarında bu məhsulun qiymətini 25 rubla (0,8 dollar) qaldırıb. Mütəxəssislərin fikrincə, bu, Rusiyada 2,2 mln. hektar əkin sahəsinin hələlik yalnız 18,9 min hektarın yığılması ilə əlaqələndirir.

Qeyd edək ki, avqustda Rusiyada qarabaşaq yarmasının defisiti səbəbindən bu məhsulun 1 kq topdansatış qiyməti 45 rubla (1,5 dollar) qalxıb, ölkənin bəzi regionlarında isə bir həftə ərzində qarabaşağın qiyməti 35 rubldan (1,1 dollar) 60 rubladək (2 dollar) bahalaşıb.

Bunun ardınca Rusiyada südün tədarük qiymətinin bahalaşması da gözlənilir. Hazırda Rusiyada 1 litr çiy südün orta qiyməti 8 rubldan (0,20 ABŞ dolları) 14 rubladək (0,46 dollar) qalxıb. Ölkənin mərkəzi regionunda isə südün qiyməti 15-19 rubl (0,50-0,60 dollar) təşkil edir. Nəticədə bu ilin sentyabr ayında ölkədə süd məhsullarının qiymətinin 15-20% bahalaşacağı gözlənilir. Eyni zamanda Rusiyada çörəyin qiymətinin də 15% artması proqnozlaşdırılır. Hazırda Rusiyada kartof, yağ və digər məhsulların qiymətində artım müşahidə olunur.