Aqrar-sənaye kompleksi

Azərbaycanın «Lənkəran Çay-5» ASC-nin 30% səhmini yerli fiziki şəxs alıb

17 sentyabr 2010 08:25 (UTC +04:00)

Bakı. Nicat Mustafayev – APA-Economics. Azərbaycan Əmlak Məsələləri Dövlət Komitəsi «Lənkəran Çay-5» ASC-nin səhmlərinin pul hərracında satılmamış 30% hissəsinin özəlləşdirilməsi ilə əlaqədar elan edilmiş investisiya müsabiqəsinə yekun vurub.

Dövlət Komitəsindən «APA-Economics»ə verilən məlumata görə, müsabiqədə iştirak etmək üçün bir neçə iddiaçı tərəfindən ərizə və investisiya təklifləri təqdim edilib. Müsabiqə Komissiyasının açıq səsvermə yolu ilə qəbul etdiyi qərara əsasən, Azərbaycan vətəndaşı olan fiziki şəxs müsabiqənin qalibi elan edilib.

İnvestitsiya müsabiqəsində qalib gəlmiş investor tərəfindən təqdim olunmuş İnvestisiya Proqramına əsasən müəssisəyə istehsal məqsədləri üçün 6 ay ərzində 259,9 min manat həcmində investisiya qoyuluşları həyata keçiriləcək. Bu investisiyalar yeni emal texnologiyası tətbiq etməklə istehsalın genişləndirilməsi və çay şitillərinin yetişdirilməsi istiqamətində fermentasiya sexinin, kiçik çaytəmizləmə sexinin, laboratoriya otağının, eləcə də içşilər və təcrübə keçən tələbələr üçün məğələ otağının tikintisinə yönəldiləcək. Eyni zamanda, çayçeşidləmə və çöptəmizləyici avadanlıqların alınıb quraşdırılması, inzibati binanın əsaslı təmiri, çay toxumlarının alınması, əkilməsi və çay şitillərinin tədarükü həyata keçiriləcək. Nəticə etibarı ilə, investisiya layihəsini həyata keçirməklə çay istehsalının 3 dəfə artırılmasına, müəssisədə olan torpaq sahələrində 14 hektara yaxın yeni çay plantasiyalarının salınmasına və beləliklə, ekoloji təmiz çay məhsulunun alınmasına nail olunacağı və bütün bunların yeni meşə zolaqlarının salınmasına şərait yaradacağı gözlənilir.

Bununla yanaşı, müsabiqənin digər şərtlərinə müvafiq olaraq, müsabiqənin qalibi 45 min manat vəsaitin dövlət büdcəsinə köçürülməsini öhdəsinə götürüb.

Həyata keçirilən investisiya layihəsinə uyğun olaraq istehsalın bərpası və inkişaf etdirilməsi nəticəsində müəssisədə 20 yeni iş yerinin açılması, digər sosial tədbirlərin həyata keçirilməsi nəzərdə tutulur.