Aqrar-sənaye kompleksi

Azərbaycan parlamenti “Kənd təsərrüfatı kooperasiyası haqqında” qanun layihəsinin müzakirəsinə hazırlaşır

23 sentyabr 2010 09:38 (UTC +04:00)

Bakı. Rəşad Süleymanov - APA-Economics. Azərbaycan Milli Məclisinin Aqrar siyasət komitəsinin iclası keçirilib.

APA-nın məlumatına görə, iclasda öncə komitənin 2010-cu ilin yaz sessiyası ərzində gördüyü işlərə dair hesabatı dinlənilib.

Komitə sədri Eldar İbrahimov bildirib ki, yaz sessiyası ərzində 5 iclas keçirilib. Bu iclaslarda 8 məsələ, o cümlədən 6 qanun layihəsi müzakirə olunub. Hesabat dövründə Komitəyə 94 vətəndaşın imzası ilə ərizə, şikayət və müraciət daxil olub. Bu ərizələrdən 22-si torpaq və torpaq üçün kompensasiya məsələləri, digər 28 ərizə isə iqtisadi və sosial problemlərlə bağlı olub.

Daha sonra Aqrar siyasət komitəsinin 2010-cu ilin payız sessiyası üçün qanunvericilik işləri planı təsdiqlənib. Qeyd olunub ki, payız sessiyasında bir sıra qanunlara əlavə və dəyişikliklər olacaq.

“Kənd təsərrüfatı kooperasiyası haqqında” qanun layihəsinin birinci oxunuş üçün müzakirəsi zamanı bildirilib ki, qanun layihəsi üzrə 20-dən artıq dövlət təşkilatından rəylər alınıb. Qanun ölkədə kənd təsərrüfatının inkişafına, daxili bazarın qorunmasına təkan verəcək. Hazırda Azərbaycanda 179 kənd təsərrüfatı kooperativi var. Qanun layihəsi 8 fəsil və 47 maddədən ibarətdir.

E.İbrahimov bu qanunun kolxoz-sovxoz yaradılması istiqamətində bir addım olması barədə deyilənlərin doğru olmadığını bildirib: «Kooperasiya olmaq məcburi deyil, könüllüdür. Kooperasiyalar Avropa ölkələrində də var. Bu qanun kənd təsərrüfatında məhsul istehsalı ilə yanaşı, bazarda qiymət artımının da qarşısını alacaq».

Komitə sədri onu da vurğulayıb ki, bu qanun Aqrar Universitet tərəfindən də bəyənilib.

Daha sonra qanun layihəsi parlamentin iclasına tövsiyə olunub.