Aqrar-sənaye kompleksi

Nazir: “Bu il Azərbaycanda dənli və dənli paxlalıların istehsalı 30-33% azalacaq”

29 sentyabr 2010 11:20 (UTC +04:00)

Bakı. Elnur Hüseynquluyev - APA-Economics. Bu il Azərbaycanda dənli və dənli paxlalıların istehsalı 2 mln. ton civarında nəzərdə tutulub ki, bu da ötən ilki rəqəmlə müqayisədə 30-33% az olacaq.

«APA-Economics»in məlumatına görə, bunu Azərbaycanın kənd təsərrüfatı naziri İsmət Abasov bildirib.

İ.Abasovun sözlərinə görə, ötən illə müqayisədə Rusiya, Ukrayna və Qazaxıstanda da istehsal az olub. Belə ki, ötən illə müqayisədə bu ölkələrdə dənli və dənli paxlalıların istehsalı 40% az olub. Bu azalmanın əsas səbəbi isə təbii fəlakətlər, havaların qeyri-sabit keçməsi, həmçinin mayalanma dövründə mütəmadi olaraq yağışların yağması və sonradan havaların istiləşməsi ilə bağlı olub.

İ.Abasov bildirib ki, sadalanan mənfi amillər builki istehsala da öz mənfi təsirini göstərib: «Amma bu o demək deyil ki, bu, hər hansı bir problem yarada bilər. Əgər statistik rəqəmlərə nəzər salsaq, görərik ki, ilin əvvəlindən indiyədək 1,3 mln. ton ərzaq buğdası istehsal olunub. Bundan başqa, bu ilin avqust ayı daxil olmaqla Azərbaycana təxminən 700 min ton ərzaq buğdası idxal olunub və buğdanın idxalı bu gün də davam edir».

İ.Abasov istehsal olunan və idxal olunan buğdanı həmçinin tələbat nəzərə alınmaqla balansda kifayət qədər buğda qalığının olduğu bildirib: «Buna baxmayaraq, dövlət bu sahədə öz siyasətini davam etdirir. Bu yaxınlarda Fövqəladə Hallar Nazirliyinin tərkibində yaradılan Taxıl Fonduna 250 min tona yaxın buğdanın alınması nəzərdə tutulub», - deyə İ.Abasov bildirib.

İ.Abasov həmçinin növbəti ildən Qazaxıstanın Azərbaycana taxıl ixracının azalacağını bildirib.