Aqrar-sənaye kompleksi

Ana səhifə

Türkiyə Azərbaycanın aqrar sektorunda yeni layihələr həyata keçirəcək

04 oktyabr 2010 13:33 (UTC +04:00)

Bakı. Rəşad Süleymanov – APA-Economics. Türkiyə Nazirlər Kabinetinin Türk Əməkdaşlıq və İnkişaf İdarəsi (TİKA) Azərbaycanın aqrar sektorunda bir sıra layihələr həyata keçirməyi planlaşdırır. Bu barədə «APA-Economics»ə TİKA-nın Azərbaycan üzrə proqram koordinatoru Orhan Qazigil məlumat verib.

İndiyədək Azərbaycanda kənd təsərrüfatı ilə bağlı bir çox layihələrdə iştirak etdiklərini bildirən TİKA nümayəndəsinin sözlərinə görə, Xaçmaz rayonunda toxumçuluq təsərrüfatının yaradılması, Qubada torpaq analizləri üçün laboratoriyanın yaradılması, Türkiyə və Azərbaycan arasında əkinçilik sahəsində təcrübə mübadilələrinin təşkili və s. kimi layihələr olub.

«Biz aqrar sektora böyük önəm veririk. Azərbaycanın bu sahədə böyük potensialı var. Ərzaq təhlükəsizliyində xarici asılılığın azaldılması, modern texnologiyaların tətbiqi Azərbaycanda qarşıya qoyulan vacib məsələlərdəndir», - deyən O.Qazigilin sözlərinə görə, Türkiyə su israfını azaltmaq məqsədi daşıyan damla sulama sisteminin qurulması sahəsində öz təcrübəsini Azərbaycana təklif edir.

TİKA nümayəndəsi yeni layihələr barədə də məlumat verib. O.Qazigilin sözlərinə görə, bunlardan biri Türkiyənin kənd təsərrüfatı kreditlərinin verilməsi sahəsində təcrübəsinin Azərbaycanda tətbiqidir: «Hazırda Azərbaycanda kənd təsərrüfatı kreditlərinin verilməsi sisteminin təkmilləşdirilməsi, kənd təsərrüfatı istehsalçılarını dəstəkləyən layihələri necə hazırlaya bilərik kimi məsələlər üzərində düşünürük. Hələ ki bu, layihə formasındadır və ümid edirəm ki, Azərbaycan tərəfi bizim təklifləri dəstəkləyəcək».

TİKA-nın son zamanlar diqqət yetirdiyi digər sahə isə Azərbaycanda ipəkçiliyin inkişafıdır. O.Qazigil bu sektorla bağlı layihələrin olacağını da istisna etməyib. TİKA nümayəndəsi bununla bağlı araşdırmalar aparmaq üçün Azərbaycanın qərb bölgələrinə səfərlər edəcəklərini bildirib. Kənd Təsərrüfatı Nvzrliyi rəsmilərinin də bu sahədə layihələrə maraqlarını ifadə etdiklərini vurğulayan təşkilat rəsmisi əlavə edib ki, layihə çərçivəsində azərbaycanlı mütəxəssislərin Türkiyədə ipəkçiliyin mərkəzi sayılan Bursa vilayətində təcrübə keçmələri təmin olunacaq.

«Biz həmçinin Aqrar Universitetlə bağlı bir layihə həyata keçirmək niyyətindəyik. Bu layihə çərçivəsində Türkiyənin universitetlərindən mütəxəssislər gəlib burada təcrübələrini bölüşəcəklər», - deyə TİKA nümayəndəsi vurğulayıb.

Təşkilat rəhbəri TİKA-nın dəstəyi ilə Azərbaycanda arıçılığın inkişafına da yönəlmiş bir neçə layihənin həyata keçirildiyini qeyd edib. Bu layihələr çərçivəsində Azərbaycan arıçıları Türkiyədə arıçılıq sahəsində xidmət təcrübəsini öyrənib və Azərbaycanda tətbiq edirlər.

Qeyd edək ki, TİKA 1992-ci ildə yaradılıb. Təşkilat Qafqaz, Yaxın Şərq, Balkan ölkələri, Mərkəzi Asiya və Afrika daxil olmaqla dünyanın müxtəlif bölgələrində ofislərə malikdir.