Aqrar-sənaye kompleksi

Ana səhifə

Azərbaycanda balıq yemi istehsal edən zavodun yenidən açılışı olub

18 oktyabr 2010 09:49 (UTC +04:00)

Bakı. Viktoriya Dementyeva - APA-Economics. Azərbaycanın Şəki şəhəri yaxınlığında balıq yemi istehsal edən zavodun yenidən rəsmi açılışı olub.

ABŞ-ın Azərbaycandakı səfirliyinin mətbuat xidmətindən “APA-Economics”ə verilən məlumata görə, yerli balıqçılıq fermerlərinin yüksək keyfiyyətli alabalıq və karp balığı yeminə olan ehtiyaclarını araşdırmaq məqsədilə ABŞ Beynəlxalq İnkişaf Agentliyi (USAİD) balıq yemi istehsal edən zavodun bərpasını dəstəkləmək üçün kiçik qrant təmin edib.

“USAİD balıqçılıq sektoruna dəstək verməklə Azərbaycanda rəqabətin artmasını təşviq etməkdən qürur duyur”, - deyə USAİD-in İqtisadi inkişaf üzrə direktoru xanım Şila Yanq bildirib. Onun sözlərinə görə, balıq yemi istehsal edən zavodun bərpası yerli balıqçılıq fermerlərinə balıqçılıq bizneslərini inkişaf etdirmək üçün lazım olan əsas xammalı idxal etmək əvəzinə yerli olaraq təmin etmək imkanı verməklə Azərbaycanda yeni biznesin inkişafına, habelə balıqçılıq sektorunun rəqabət qabiliyyətinin artırılmasına şərait yaradır.

Ötən il ərzində Özəl Sektorun Rəqabətliliyinin Gücləndirilməsi Proqramı (PSCEP) Azərbaycanda balıqçılıq sektorunun rəqabət qabiliyyətinin artırılması üçün geniş yardım təmin edib. 2009-cu ildə USAİD-in texniki yardımı ilə 500 min balıq yumurtasının alınması üçün fermerlər bir araya gəlib. 2010-cu ildə USAİD-in texniki yardımı ilə 1 mln. yüksək keyfiyyətli balıq yumurtasının alınması üçün daha çox fermerin bir araya gəlməsi gözlənilir. USAİD-in balıqçılıq sektoruna yardımı sahəsində yeni balıq yemi istehsal edən zavod mühüm hissədir və balıq yetişdirilməsində fermerlərin keyfiyyətli yemə olan tələbatını təmin etməyə kömək edəcək.

“Balıqlar üçün yaxşı keyfiyyətli yemin təmin edilməsinə töhfə verməklə Azərbaycanın balıqçılıq sektorunun irəliyə doğru aparılmasında Qırxbulaqdakı təkmilləşdirilmiş balıq yemi istehsal edən zavod mühüm mərhələdir. Ümid edirik ki, bu, başqalarının nail olmağa çalışacaqları bir model olacaq. USAID-in PSCEP layihəsi bu yolda tərəfdaş olmaqdan məmnundur. Biz Qırxbulaq əməliyyatına və Azərbaycanın balıqçılıq sənayesinə uğurlar arzu edir və bu yerli səylərin nəticəsi olaraq balıq istehsalı və bazarında əhəmiyyətli inkişafın olmasını səbirsizliklə gözləyirik”, - deyə PSCEP-in Layihə Rəhbəri Harvi Şartap bildirib.